له‌ هه‌ولێر دووکاندارێک زیاتر لە 50 ملیۆن دیناری ده‌فه‌وتێت و ئاڤا چیرۆکەکەی دەگێڕێتەوە

ئاڤا نیوز

دووکاندارێک لە بازاڕی داون تاونی هەولێر دەڵێت، بەهۆی سەرپەرشتیارانی بازاڕەکەوە زیانێکی ماددی گەورەی بەرکەوتووە کە بە 50 ملیۆن دینار مەزەندە دەکرێت، لە کاتێکدا ئیدارەی بازاڕەکەش دەڵێن، "چاوەڕێی بڕیاری دادگا دەکەین."

چیرۆکی سەرەکی: ئەحمەد کەریم، خاوەنی دووکانێکە لە داون تاونی هەولێر، لەسەر داوای خودی سەرپەرشتیارانی داون تاون، دوکانێکی تایبەت بە کەلوپەلی ئەنتیک و کلتووری و کۆن لە نهۆمی سێیەمی بازاڕەکە کردووەتەوە. ئامانجیان ئەوە بووە کە ئەم دوکانە ببێتە هاندەرێک بۆ ئاوەدانکردنەوەی نهۆمەکە و ڕاکێشانی خەڵک و کردنەوەی دوکانی دیکە.

لێدوانی فەرمی: ئەحمەد کەریم بە ئاڤای گوت، "دوای تەنها سێ مانگ، دوکانەکەیان لێ وەرگرتمەوە و تاوەکو ئێستاش ڕێگەم پێنادەن کەلوپەلەکانم بهێنمەوە دەرەوە."

کاریگەری و لێکەوتەکان: زیانەکە تەنها لەدەستدانی دووکانەکە نییە، ناوبراو ئاماژە بەوەش دەکات، بەشێک لە کەلوپەلەکانی کە نرخەکەیان دەگاتە نزیکەی 50 ملیۆن دینار، یان براون یاخود شکێندراون و ئامادەنین قەرەبووی بکەنەوە.

 

دواتر چی ڕووی دا؟ ئەم کێشەیە ئێستا گەیشتووەتە دادگا، بەڵام چارەسەرکردنی ئاسان نەبووە. بەپێی زانیارییەکان، تاوەکو ئێستا نۆ دانیشتنی دادگا بۆ ئەم کەیسە بەڕێوەچووە، بەڵام بەهۆی ئامادەنەبوونی نوێنەری کۆمپانیای داون تاون لە دانیشتنەکاندا، کەیسەکە هێشتا یەکلایی نەبووەتەوە.

بۆچوونی لایەنی بەرامبەر: ئاڤا  پەیوەندی بە بەرپرسانی بازاڕی داون تاونەوە کردووە. ئەوان لە وەڵامدا ڕایانگەیاندووە: "ئەمە کێشەیەکی کۆنە. ئێمە نەک تەنها بۆ ئەم کەیسە، بەڵکو بۆ هەر کێشەیەکی دیکەش، چاوەڕێی بڕیاری کۆتایی دادگا دەکەین و هەر بڕیارێک دەربچێت، ئێمە پێوەی پابەند دەبین."