لە سلێمانی بە ناوی فرۆشتنی زەوییەوە 20 هەزار دۆلار لە هاونیشتمانییەک وەردەگیرێت

ئاڤا نیوز

لە سلێمانی، بەناوی فرۆشتنی زەوییەوە فێڵ لە هاونیشتمانییەک دەكرێت و دوو دەفتەر دۆلاری لێ وەردەگیرێت.

چیرۆکی سەرەکی: نەوزاد نامیق، دانیشتووی شاری سلێمانییە و باوكی ئەو كەسەیە كە فێڵەكەی لێ كراوە، چیرۆكەكە بۆ ئاڤا دەگێڕێتەوە و دەڵێت: كوڕەكەم تەمەنی تەنیا 17 ساڵە، كەسێك كە تەمەنی 29 ساڵە و خۆی كردووە بە هاوڕێی كوڕەكەم و چەند جارێك قەرزی لێی كردووە، دواتر داوای دەفتەرێك دۆلاری لێ کردووە بەناوی ئەوەی کە لە بری هەموو قەرزەكان زەوییەكی پێ دەفرۆشێت، "واتە بە گشتی دوو دەفتەر دۆلاری لە كوڕەكەم قەرز كردووە".

دەشڵیت، "ئەو کەسە تاپۆی زەوییەكە و وەكالەتنامە و ناسنامەیەكی داوەتە كوڕەكەم، دواتر بۆمان دەركەوتووە كە سەرجەم بەڵگەنامەكان بە تاپۆی زەوییەكەش ساختەن، ئێستا سكاڵامان لەلای پۆلیس تۆمار كردووە، بەڵام تاوەكو ئێستا دەستگیر نەكراوە".

لێدوانی فەرمی: سەرکەوت ئەحمەد،  وتەبێژی پۆلسی سلێمانی بە ئاڤای گوت: دۆسیەمان بۆ کردووەتەوە و لە هەر شوێنێك بێت ئەو کەسە دەستگیر دەكەین.