عێراق و نەتەوە یەکگرتووەکان ڕێکارەکانی کۆتاییهێنان بە ئەرکی یونامی تاوتوێ دەکەن

ئاڤا نیوز

لە کۆبوونەوەیەکی ئاستبەرزدا لە نیویۆرک، عێراق و نەتەوە یەکگرتووەکان بە فەرمی تاوتوێی ڕێکارەکانی کۆتاییهێنان بە ئەرکی نێردەی نەتەوە یەکگرتووەکان بۆ هاریکاریی عێراق (یونامی)ـیان کرد کە بڕیارە تا کۆتایی ئەمساڵ جێبەجێ بکرێت.

ئەوەی پێویستە بیزانیت: بەگوێرەی بڕیاری ئەنجوومەنی ئاساییشی نەتەوە یەکگرتووەکان، ئەرکی تیمی نەتەوە یەکگرتووەکان بۆ یارمەتیدانی عێراق (یونامی) لەکۆتایی ئەمساڵدا تەواودەبێت و هەموو کارەکانی یونامی ڕادەگیرێن.

چیرۆکی سەرەکی: لە پەراوێزی کارەکانی کۆنفرانسی نێودەوڵەتیی نەتەوە یەکگرتووەکان تایبەت بە پرسی فەڵەستین، فوئاد حوسێن، جێگری سەرۆکوەزیران و وەزیری دەرەوەی عێراق لەگەڵ ئەنتۆنیۆ گۆتێرێز، سکرتێری گشتیی نەتەوە یەکگرتووەکان کۆبووەوە.

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوەی عێراق، هەردوولا جەختیان لەسەر پابەندبوون بەو وادە دیاریکراوە کردەوە کە لەگەڵ پێشهاتە ئەرێنییەکانی عێراقدا دەگونجێت.

وەزیری دەرەوەی عێراق ڕۆڵی گرنگی نەتەوە یەکگرتووەکانی لە پشتیوانیکردنی عێراق لە قۆناغەکانی ڕابردوودا، بەتایبەت لە بوارەکانی سەقامگیری و بەهێزکردنی پرۆسەی سیاسی، بەرز نرخاند.

هەر بەگوێرەی ڕاگەیێنراوەکە:

- هەردوولا بە وردی گفتوگۆیان لەبارەی ئەو هەنگاوە کردارییانە کردووە کە پێویستن بۆ مسۆگەرکردنی کۆتاییهێنانێکی ڕێکوپێک بە ئەرکی نێردەکە، بەشێوەیەک کە لەگەڵ پلانە ڕێککەوتوولەسەرەکاندا یەک بگرێتەوە.

- هەردوولا هاوڕابوون لەسەر گرنگیی گەیشتن بە چارەسەرێکی سیاسیی گشتگیر کە یەکپارچەیی خاکی سووریا بپارێزێت و ئاسایشی تەواوی ناوچەکە بەهێز بکات.