ئەنجوومەنی ئاسایشی نیشتیمانی تورکیا سەبارەت بە پرسی چەکدانانی پەکەکە کۆدەبێتەوە

ئاڤا نیوز

ئەنجوومەنی ئاسایشی نیشتیمانی تورکیا بە سەرپەرشتی ڕەجەب تەیب ئەردۆغان، سەرۆککۆماری تورکیا کۆدەبێتەوە، پرسی چەکدانانی پەکەکە و پرۆسەی ئاشتی ئەجێندای کۆبوونەوەکە دەبێت.

چیرۆکی سەرەکی: چوارەم کۆبوونەوەی ئەنجوومەنی ئاسایشی تورکیا بە سەرۆکایەتی ئەردۆغان لە ناوچەی بێشتەپە  لە ئیستەنبووڵ دەکرێت، پرۆسەی ئاشتی و چەکدانانی پەکەکە تاوتوێ دەکرێت.

زانیارییی بەدەستهاتوو: لە کۆبوونەوەکەدا، دوایین پێشهاتەکانی چەکدانانی پەکەکە گفتوگۆی لەسەر دەکرێت، زانیارییەکانی هەواڵگری و سوپای تورکیا لە دوای چەکدانانی 11ی تەممووزی پەکەکە تاوتوێ دەکرێت. هاوکات باس لە چالاکییە درێژکراوەکانی پەکەکە لە سووریا و ئەوروپا دەکرێت.

لەلایەکی دیکەوە: ئیبراهیم کاڵن، سەرۆکی دەزگای هەواڵگریی تورکیا بڕیار و زانیارییەکانی کۆبوونەوەکە لەگەڵ پارتە سیاسییەکان تاوتوێ دەکا، بۆئەوەی کار لەسەر پرۆسەی ئاشتی بکەن.

زانیاریی زیاتر: بەپێی زانیارییەکان، دۆخی سووریا و هەوڵەکان بۆ هێورکردنەوەی گرژی نێوان درووزەکان و حکومەتی سووریا تەوەرێکی دیکەی کۆبوونەوەکە دەبێت. هەروەها هێرشەکانی ئیسرائیل بۆ سەر غەززە و هەوڵە دیپلۆماسییەکان بۆ ئاگربەستی غەززە دەخرێتە سەر مێزی گفتوگۆ.

ئەمەش بزانە: لە کۆبوونەوەکەدا باس لە ڕووداوی ئاگرکەوتنەوەکانی ناوچە جیاجیاکانی تورکیا دەکرێت. توانای دەستوەردان، ئەو ڕێوشوێنانەی کە گیراوەتەبەر و ئەگەری تێکدان لە چوارچێوەی ئاسایشدا باس دەکرێن.