وەزارەتی ناوخۆی عێراق: لە ئۆپەراسیۆنێکی دەرەوەی سنووردا دەستبەسەر زیاتر لە ملیۆنێک حەبی کەپتاگۆندا گیرا

ئاڤا نیوز

وەزارەتی ناوخۆی عێراق ڕایگەیاند، لە ئۆپەراسیۆنێکی تایبەتی دەرەوەی سنووردا کە لە شاری دیمەشقی پایتەختی سووریا ئەنجامدرا، توانرا دەستبەسەر زیاتر لە ملیۆنێک و 350 هەزار حەبی هۆشەبەری جۆری کەپتاگۆندا بگیرێت و یەکێک لە مەترسیدارترین تۆڕەکانی بازرگانیی نێودەوڵەتیی ماددە هۆشبەرەکان هەڵبوەشێنرێتەوە.

وێنە گەورەکە: لە سەردەمی دەسەڵاتی بەشار ئەسەد، سووریا ببوو بە ناوەندی بەرهەمهێنانی حەبی کەپتاگۆن و لەوێوە ڕەوانەی وڵاتانی دیکەی عەرەبی دەکرا، لەم بوارەشدا حکومەت بە کارئاسانیکردن بۆ بەرهەمهێنانی ئەو ماددە هۆشبەرە تۆمەتبار دەکرا.

ڕاگەیێنراوی فەرمی: بەگوێرەی ڕاگەیێنراوی وەزارەتی ناوخۆی عێراق، ئۆپەراسیۆنەکە بە سەرپەرشتیی ڕاستەوخۆی فەرماندەی گشتیی هێزە چەکدارەکان و بە ئاراستەکردن و چاودێریی مەیدانیی وەزیری ناوخۆ ئەنجامدراوە. ئاماژەی بەوەشکردووە کە کارەکە بەپێی ڕەزامەندیی دادوەری لە دادگای لێکۆڵینەوەی ناوەندی لە ڕەسافە و بە هەماهەنگی لەگەڵ لایەنە پەیوەندیدارەکان لە سووریا کراوە.

شێوازی جێبەجێکردن: بەگوێرەی ڕاگەیێنراوەکە، هێزێکی تایبەتی بەڕێوەبەرایەتیی گشتیی نەهێشتنی ماددە هۆشبەرەکان، بە پشتبەستن بە هەوڵی هەواڵگریی ورد و سەرچاوەی باوەڕپێکراو لەناو تۆڕەکانی بازرگانیکردن، بە هاوکارییەکی نزیک لەگەڵ بەڕێوەبەرایەتیی نەهێشتنی ماددە هۆشبەرەکانی سووریا، ئەرکە ئەمنییەکەیان لە دیمەشق جێبەجێ کرد.

چی ڕوویدا: لە ئەنجامدا، دەست بەسەر زیاتر لە ملیۆنێک و 350 هەزار حەبی کەپتاگۆندا گیرا، کە کێشەکەی بە نزیکەیی 215 کیلۆگرام مەزەندە دەکرێت، هەروەها یەکێک لە مەترسیدارترین تۆڕە تاوانکارییەکانی بازرگانیی نێودەوڵەتیی ماددە هۆشبەرەکان تێکشکێندرا.

لەهەمان کاتدا: وەزارەتی ناوخۆ جەختی لەوە کردەوە کە "ئەم دەستکەوتە هەنگاوێکی دیارە لە چوارچێوەی کاری هاوبەشی نێودەوڵەتی بۆ ڕووبەڕووبوونەوەی هەڕەشە سنووربڕەکان، هەروەها ڕەنگدانەوەی پەرۆشیی دەوڵەتی عێراقە بۆ پاراستنی ئاسایشی کۆمەڵگە لە بەڵای ماددە هۆشبەرەکان و ڕاوەدوونانی بازرگانانی ژەهر لە هەر شوێنێک بن."