لیستی باڵیۆزە نوێیەکانی عێراق کاردانەوەی لێدەکەوێتەوە

ئاڤا نیوز

لیژنەی پەیوەندییەکانی دەرەوەی پەرلەمانی عێراق ئاشکرای کرد، لیستی باڵیۆزە نوێیەکانی عێراق ڕووبەڕووی ڕەخنە و ڕەتکردنەوەی بەرفراوانی پەرلەمان بووەتەوە، چونکە ژمارەیەکی زۆر لە کەسە نزیک و خزمەکانی بەرپرسانی باڵای تێدایە.

چیرۆکی سەرەکی: لە کۆبوونەوەی ڕۆژی سێشەممە 2025-07-23 ئەنجوومەنی وەزیرانی عێراق، دەنگ لەسەر دامەزراندنی ژمارەیەک باڵیۆز درا و ناوەکانیان ئاراستەی ئەنجوومەنی نوێنەران کرا بە مەبەستی دەنگدان لەسەریان.

لێدوانی فەرمی: حەیدەر سەلامی، ئەندامی لیژنەی پەیوەندییەکانی دەرەوەی پەرلەمانی عێراق بە ئاڤا میدیای ڕاگەیاند: لیستی باڵیۆزە نوێیەکانی عێراق کە  ئەنجوومەنی وەزیران دەنگی لەسەردا و ئاراستەی پەرلەمانی کرد بۆ پەسەندکردنی، لە پەرلەمان بە هەموو شێوەیەک ڕێگری لێدەکەین و ناهێڵین تێپەڕێت.

زانیاریی زیاتر: بەگوتەی سەلامی، "لیستەکە ژمارەیەکی زۆر لە کەسە نزیک و خزمەکانی بەرپرسانی باڵای تێدایە، هاوکات کەسەکان لەسەر بنەمای ئەزموون و کارامەیی دیاری نەکراون".

لەلایەکی دیکەوە: ڕائید مالیکی، پەرلەمانتاری عێراق، لیستەکەی بە لیستی چاودێریی کۆمەڵایەتی وەسف کرد و داوای دووبارە پێداچوونەوەی لەناوەکان کرد.

ئه‌وه‌ی پێویسته‌ بیزانیت: ژمارەیەک لە بەرپرسان، پەرلەمانتاران و میدیاکاران لیستێکیان بڵاوکردووەتەوە کە ناوی کەسانی نزیک، زاوا، کوڕ و برا و ئامۆزای بەرپرسانی باڵای تێدایە و لەلایەن ئەنجوومەنی وەزیرانەوە پەسەند کراون و بەم شێوەیەیە:

٠ لەیف سەدر، ئامۆزا و زاوای حوسێن ئیسماعیل سەدر.

٠ حەیدەر غەبان، برازای سالم غەبان، وەزیری پێشووتری ناوخۆ و سەرکردەی دیاری ڕێکخراوی بەدر.

٠ باقر نەجار، زاوای هومام حەموودی، سەرۆکی ئەنجوومەنی باڵا و هاوپەیمانیی "ئیبشر یاعێراق".

٠ نیزار حەسەن محەمەد تەقی حەکیم، برازای عەبدولهادی حەکیم، پەرلەمانتاری پێشوو.

٠ ڕەحمان عامری، برای هادی عامری، ئەمینداری گشتیی ڕێکخراوی بەدر.

٠ حوسێن سودانی، ئامۆزای محەمەد شیاع سودانی، سەرۆک وەزیرانی عێراق.

٠ قەیس عامری، زاوای فالح فەیاز، سەرۆکی دەستەی حەشدی شەعبی.

٠ ئیحسان عەوادی: بەڕێوەبەری ئێستای نووسینگەی سەرۆکوەزیران.

٠ جوان ئیحسان فەوزی، سەرۆکی فراکسیۆنی یەکێتیی نیشتمانیی کوردستان لە پەرلەمانی عێراق.

محەمەد ئەشەیقەر، برازای ئیبراهیم جەعفەری، سەرۆکوەزیرانی پێشووتری عێراق.

٠ عەبدولباست مەشهەدانی، کوڕی مەحموود مەشهەدانی، سەرۆکی ئێستای ئەنجوومەنی نوێنەران.

٠ یەزن جبووری، کوڕی مەشعان جبووری، سیاسەتمەدار.

٠ مورتەزا سوهەیل، برای هیشام سوهەیل، پەرلەمانتاری پێشوو و نەعیم سوهەیل، ڕاوێژکاری سەرۆکایەتیی کۆمار لەسەر پشکی دەوڵەتی یاسا.