ئەمریکا گەورەترین پاکێجی سزاکانی دژی ئێران ڕاگەیاند

ئاڤا نیوز

وەزارەتی گەنجینەی ئەمریکا، لە گەورەترین هەنگاوی خۆیدا لە ساڵی 2018ـەوە، سزای بەسەر زیاتر لە 50 کەسایەتی و لایەن و زیاتر لە 50 کەشتییدا سەپاند. ئەم سزایانە تۆڕێکی بەرفراوانی بارزگانیی دەریایی دەکاتە ئامانج کە لەلایەن محەممەد حوسێن شەمخانی، کوڕی عەلی شەمخانی، ڕاوێژکاری باڵای ڕێبەری باڵای ئێرانەوە، بەڕێوەدەبرێت.

چیرۆکی سەرەکی: تۆڕەکەی محەممەد حوسێن شەمخانی، کوڕەکەی شەمخانی، بە کەڵک وەرگرتن لە پێگەی سیاسی باوکی و گەندەڵی، کەشتیگەلێکی گەورەی لە تانکەر و کەشتیی کۆنتێنەر پێکهێناوە. ئەم تۆڕە نەوت و بەرهەمە نەوتییەکانی ئێران و ڕووسیا و کاڵای دیکە بۆ کڕیاران لە سەرتاسەری جیهان دەگوازێتەوە و بەمەش دەیان ملیار دۆلار قازانج بەدەست دەهێنێت.

لێدوانی فەرمی: سکۆت بێسێنت، وەزیری گەنجینەی ئەمریکا، لەم بارەیەوە ڕایگەیاند، ئیمپراتۆریەتی بارزگانیی خێزانی شەمخانی ئەوە دەردەخات کە چۆن دەسەڵاتدارانی ڕژێمی ئێران پێگەکانیان بۆ کۆکردنەوەی سامانی زەبەلاح و دابینکردنی دارایی بۆ ڕەفتارە مەترسیدارەکانی ڕژێم بەکاردەهێنن. ناوبراو وتیشی زیاتر لە 115 سزای ئەمڕۆ، گەورەترین هەنگاوە لەوەتەی ئیدارەی ترەمپ کەمپەینی زۆرترین گوشاری دژی ئێران دەستپێکردووە.

زانیاریی زیاتر: تۆڕەکەی حوسێن شەمخانی کۆنترۆڵی بەشێکی بەرچاوی هەناردەی نەوتی خاوی ئێرانی کردووە و داهاتەکەی سوودێکی زۆر بە خێزانەکەی و ڕژێمی ئێران دەگەیەنێت. باوکی، عەلی شەمخانی، لە ساڵی 2020ـەوە لەلایەن ئەمریکاوە سزای بەسەردا سەپێندراوە.

تۆڕەکەی محەممەد حوسێن شەمخانی لە کەشتیگەلێکی گەورە، کۆمپانیاکانی بەڕێوەبردنی کەشتی و کۆمپانیای دیکە پێکدێت کە ملیارەها دۆلار لە فرۆشی نەوتی ئێران و ڕووسیا کۆدەکەنەوە، کە زۆربەی کات بە کڕیارانی چینی دەفرۆشرێن. تۆڕەکە ڕێوشوێنی بەرفراوان بەکاردەهێنێت بۆ شاردنەوەی کارەکانیان و پەیوەندییەکانی بە خێزانی شەمخانی، ئێران و ڕووسیاوە.

حوسێن شەمخانی بۆ بەڕێوەبردنی کارەکانی ناوی خوازراو وەک "هیکتۆر" و "هوگۆ هایک" بەکاردەهێنێت، کە ناوێکی ساختەیە و لەسەر پاسپۆرتە دۆمینیکاییەکەی نووسراوە.

ئەوەی پێویستە بیزانیت:  بە گشتی سزا نوێیەکان 15 کۆمپانیای کەشتیوانی و 52 کەشتی و 12 کەسایەتی و 53 لایەنی بەشداربوو لە خۆدزینەوە لە سزاکان لە 17 وڵاتدا دەکاتە ئامانج، لە پەنەما و ئیتاڵیا تا هۆنگ کۆنگن.


شێوازی جێبەجیکردن: بەپێی ئەم سزایانە، سەرجەم موڵک و ماڵی ئەو کەسانە و لایەنانەی ناویان هاتووە لە ئەمریکا بلۆک دەکرێن و مامەڵەکردنی هاوڵاتیانی ئەمریکی لەگەڵیاندا قەدەغەیە. ئەم هەنگاوە بە هاوکاری لەگەڵ وەزارەتی دەرەوەی ئەمریکا گیراوەتەبەر کە ئەوان 20 لایەنیان سزاداوە و 10 کەشتیی وەک موڵکی بلۆکراو ناساندووە.

ئەم سزایانە لە کاتێکدایە کە یەکێتیی ئەوروپاش پێشتر سزای بەسەر حوسێن شەمخانیدا سەپاندبوو بەهۆی ڕۆڵی لە بازرگانیکردنی نەوتی ڕووسیادا.