پەرەسەندنی تەکنەلۆژیا لە چین؛ سواڵکردنیش بووە بە ئەلیکترۆنی

ئاڤا نیوز

لەگەڵ گەشەی خێرای تەکنەلۆژیا و باوبوونی مامەڵە ئەلیکترۆنییەکان لە چین، کە وەک پێشەنگی جیهان لەم بوارەدا ناسراوە، دیاردەی سواڵکردنیش شێوازێکی نوێی وەرگرتووە. ئێستا ژمارەیەک لە سواڵکەرەکانی ئەو وڵاتە، لەبری داواکردنی پارەی کاش، کۆدی QR بەکاردەهێنن بۆ وەرگرتنی یارمەتیی دارایی لە ڕێگەی ئەپڵیکەیشنەکانی وەک "ویچات" (WeChat).

وێنە گەورەکە: وڵاتی چین بەهۆی پێشکەوتنی بەرچاوی لە بواری مامەڵەی ئەلیکترۆنیدا، بووەتە کۆمەڵگەیەکی تاڕادەیەکی زۆر بێ پارەی کاغەز. هاووڵاتیان و گەشتیاران دەتوانن بۆ هەموو کڕین و مامەڵەیەکی ڕۆژانە، لە فرۆشگاکانەوە تا بازاڕە میللییەکان، پارە لە ڕێگەی مۆبایلەکانیانەوە بدەن.

کاریگەریی و لێکەوتەکان: ئەم گۆڕانکارییە فراوانە کاریگەریی لەسەر سواڵکەرەکانیش داناوە، کە بۆ ئەوەی لەم سیستمە نوێیەدا بێبەش نەبن، ڕوویان لە بەکارهێنانی تەکنەلۆژیای مۆبایل کردووە. ئەوان کۆدی تایبەت لەسەر پارچە کارتۆنێک چاپ دەکەن و لەبەردەم خۆیانی دادەنێن، بەمەش ڕێگە بە خێرخوازان دەدەن بە سکانکردنێکی خێرا و لە ماوەی چرکەیەکدا یارمەتییەکانیان بگەیەنن.

ببینە و ببیستە: بڵاوبوونەوەی گرتەیەکی ڤیدیۆیی لە تۆڕە کۆمەڵایەتییەکاندا، کە تێیدا سواڵکەرێک داوا لە کەسێک دەکات کۆدەکەی سکان بکات، کاردانەوەی زۆری لێکەوتەوە. بەکارهێنەران سەرسووڕمانی خۆیان دەربڕی لە ئاستی پەرەسەندنی تەکنەلۆژیا لە چین و چۆنیەتیی خۆگونجاندنی هەموو چین و توێژەکانی کۆمەڵگە لەگەڵیدا.

ئەم گەشە خێرایەی مامەڵە ئەلیکترۆنییەکان لە چین، کە لە ماوەی پێنج ساڵی ڕابردوودا ژمارەی پێوانەیی تۆمار کردووە، بەرهەمی پشتیوانیی بەردەوامی حکومەت و کۆمپانیا گەورەکانی بواری خزمەتگوزاریی داراییە، لەنێویاندا کۆمپانیای "تێنسێنت هۆڵدینگز" کە خاوەنی ئەپڵیکەیشنی بەناوبانگی ویچاتە.