عێراقچی: دەبێت ئەمریکا قەرەبووی ماددی ئێران بکاتەوە

ئاڤا نیوز

 

عەباس عێراقچی، وەزیری دەرەوەی ئێران دەڵێت، ئەمریکا پێش ئامادەبوون بۆ گفتوگۆ لەگەڵمان، دەبێت قەرەبووی ماددیمان بکاتەوە.

 

وێنە گەورەکە: دوای جەنگی 12 رۆژی نێوان ئێران و ئیسرائیل هاوکات هێرشی ئەمریکا بۆ سەر بنکە ئەتۆمییەکانی ئێران، گفتوگۆ و دانوستان لەبارەی بەرنامە ئەتۆمییەکەی تاران لە نێوان ئەمریکا و ئێران وەستا، تا ئێستا ئێران ئامادەیی بۆ دانیشتن لەگەڵ ئەمریکادا دەرنەبڕیوە.

 

لێدوانی فەرمی: عەباس عێراقچی، وەزیری دەرەوەی ئێران ڕایگەیاند، ئەمریکا دەبێت بۆمان ڕوون بکاتەوە بۆچی لە گەرمەی گفتوگۆ و دانوستانەکان هێرشیان کردەسەرمان. عێراقچی مەرج بۆ دەستپێکردنەوەی گفتوگۆ و دانوستانەکان لەگەڵ واشنتن دادەنێت و دەڵێت، ئەمریکا پێش دەستپێکردنەوەی دانوستانەکان دەبێت قەرەبووی ماددەیمان بکاتەوە بەرامبەر ئەو زیانانەی بەهۆی هێرشەکەیانەوە کردوومانە

 

هاوکات: عێراقچی داوای گەرەنتی دەکات و بەجۆرێک کە، "دەبێت ئەمریکا گەرەنتی ئەوەمان بداتێ کە جارێکی دیکە هێرشی لەو شێوەیە ناکاتەوە سەرمان."

 

-تا ئەو کاتەی ترەمپ داوای ڕاگرتنی تەواوی پیتاندنی یۆرانیۆم بکات، هیچ ڕێککەوتنێک ناکرێت لە نێوانماندا.