وەزیری دەرەوەی سووریا دەچێتە ڕووسیا و لەگەڵ سێرگی لاڤرۆڤ کۆ دەبێتەوە

ئاڤا نیوز

 

بڕیارە ڕۆژی پێنجشەممە، هەریەکە لە ئەسعەد شەیبانی، وەزیری دەرەوەی سووریا و هاوتا ڕووسییەکەی لە مۆسکۆ کۆببنەوە.

 

وێنە گەورەکە: لە دوای کەوتنی دەسەلاتی بەسار ئەسەد، سەرۆکی پێشووی سووریا و هاتنە سەر دەسەڵاتی ئەحمەد شەرع، پەیوەندییەکانی سووریا و ڕووسیا گرژی تێکەوت، بەڵام دواتر هەردوولا جەختییان لە ئاساییکردنەوەی پەیوەندییەکان و هاوکارییەکانی  نێوانیان کردەوە و هەر لەم چوارچێوەیە وەزیری دەرەوەی سووریا سەردانی ڕووسیا دەکات و لەگەڵ سێرگی لاڤرۆڤ، وەزیری دەرەوەی  ئەو وڵاتە کۆ دەبێتەوە.

 

لێدوانی فەرمی: سێرگی ڤێرشینین، جێگری وەزیری دەرەوەی ڕووسیا سەبارەت بە کۆبوونەوەکە ڕایگەیاند: پرسی سەرەکی کۆبوونەوەکە تاوتوێ کردنی هاوکارییە بازرگانی و ئابووریی و پرسە سیاسییەکانی ناوچەکەیە، هاوکات یارمەتیدانی سووریایە بۆ دەرچوون لەو دۆخە سەختەی تووشی بووە.

 

گرنگ: بڕیارە لە کۆبوونەوەکەدا گفتوگۆ بکەن لە بارەی کارکردن و دەستەبەرکردنی ئاسایشی  بنکە سەربازییەکانی ڕووسیا لە سووریا.

 

ئەوەی پێویستە بیزانیت: لە دوای کۆتاییهاتنی ڕووخانی دەسەڵاتەکەی، بەشار ئەسەد بەرەو ڕووسیا هەڵات و دەسەڵاتدارانی ئەو ولاتە لە بەیاننامەیەکدا ڕایانگەیاند: ''ڕووسیا بەهۆی بارودۆخی مرۆیی بەشار ئەسەد و بنەماڵەکەی مافی مانەوەی پێ دەبەخشێت.''