لاڤرۆڤ: ڕووسیا پشتیوانی کورد دەکات لە سووریا

ئاڤا نیوز

وەزیری دەرەوەی ڕووسیا لە کۆنگرەیەکی رۆژنامەوانیدا لەگەڵ وەزیری دەرەوەی سووریا پشتیوانی مۆسکۆ بۆ کورد لە سووریا دەردەبڕێت و دەڵێت، ویستی ڕووسیا ئەوەیە کە پەیوەندیەکانی نێوان کورد و دیمەشق جەختی لەسەر بکرێتەوە و لە چوارچێوەی سووریا کوردەکان خاوەن ماف بن.

چیرۆکی سەرەکی: لە چوارچێوەی بوونیادنانی پەیوەندیە دیبلۆماسیەکانی سووریا، ئەسعەد شەیبانی، وەزیری دەرەوەی سووریا بە سەردانێکی فەرمی گەشتە مۆسکۆی پایتەختی ڕووسیا و لەگەڵ سێرگی لاڤرۆڤ، وەزیری دەرەوەی ڕووسیا کۆبوویەوە، پەیوەندیەکانی نێوان مۆسکۆ و دیمەشق و پرسی کورد لە سووریا تاوتوێ کران.

لێدوانی فەرمی:  لاڤرۆڤ، لە کۆنگرەیەکی رۆژنامەوانی ڕایگەیاند: پرسی کوردەکان لە سووریا بەشێک بوو لە گفتوگۆکانمان، ویستی ڕووسیا ئەوەیە کە پەیوەندیەکانی نێوان کورد و دیمەشق جەختی لەسەر بکرێتەوە و لە چوارچێوەی سووریا کوردەکان خاوەن ماف بن و بتوانن بەشێکی ڕاستەقینە بن لە دەسەڵات و کۆمەڵگەی سووریا، ئەمەش بە ڕێگەی گەشتن بە ڕێککەوتن لەگەڵ دیمەشق بێتە دی، مۆسکۆ پشتیوانی لە کورد و هەموو پێکهاتەکانی سووریا دەکات بۆ دووبارە بوونیادنانەوەی سووریایەکی نوێ.

لەلایەکی دیکەوە: ئەسعەد شەیبانی، وەزیری دەرەوەی سووریا لە کۆنگرە ڕۆژنامەوانیەکەدا ڕایگەیاند: دیمەشق ویستی تەواوی هەیە بۆ بوونیادنانەوەی پەیوەندیە دیبلۆماسیەکان لەگەڵ مۆسکۆ، پەیوەندی نێوان هەردوو وڵات کاریگەری گەورەی دەبێت لەسەر سەقامگیری و پێشکەوتنی ئابووری لە سووریا و ڕۆژهەڵاتی ناوەڕاست.