ئێران لە 24 کاتژمێری ڕابردوودا گەرمترین شوێنی زەوی بووە

ئاڤا نیوز

دەزگاکانی کەشناسی ڕایدەگەیێن، پارێزگای خوزستان لە ئێران لە 24 کاتژمێری ڕابردوودا گەرمترین شوێن بووە لەسەر زەویدا کە51 پلەی سیلیزی تێپەڕاند.

وێنە گەورەکە: ماوەی چەند ڕۆژێکە شەپۆلێکی گەرمای بەرز بەشێک لە ناوچەکانی جیهانی گرتووەتەوە و ڕێکخراوی تەندروستیی جیهانیش هۆشداری لە زیانە تەندروستییەکانی بەرزبوونەوەی پلەکانی گەرما دەدات.

ڕاگەیێنراوی فەرمی: دەزگاکانی کەشناسی ڕایدەگەیێنن، شاری ئومێدییە لە پارێزگای خوزستانی ئێران لە 24 کاتژمێری ڕاردوو بە پلەی گەرمیی 51 پلەی سیلیزی گەرمترین شاری جیهان بووە، لە دوای ئەویش شاری بەسرە لە عێراق بە پلەی 50.8 پلەی سیلیزی لە پلەی دووەم و ئابادان لە ئێران بە پلەی گەرمیی 50.4 پلەی سیلیزی لە پلەی سێیەم دێت.

کاریگەرییە لاوەکییەکان: پلەی گەرمیی 50 پلەی سیلیزی بە گەرماییەکی زۆر مەترسیدار دادەنرێت و ڕێکخراوی تەندروستیی جیهانی پێشنیازی ئەوە دەکات کە خەڵک لە ماڵەوە بمێننەوە.

ئەوەی پێویستە بیزانیت: نیوەڕۆی ئەمڕۆ پێنجشەممە پلەکانی گەرما لە شاری مێهران لە پارێزگای ئیلام گەیشتە 52 پلەی سیلیزی و شاری وەرزێقانیش لە پارێزگای ئازەربایجانی ڕۆژهەڵات بە 11 پلەی سیلیزی فێنکترین شاری ئێران بوو.