لیژنەیەکی نوێ لەبارەی هێرشە درۆنییەکان سەردانی هەولێر دەکات

ئاڤا نیوز

لیژنەیەکی نوێ و تایبەتمەند بە بواری ئەمنیی لە عێراقەوە بۆ لێکۆڵینەوە لە هێرشە درۆنییەکانی سەر کێڵگە نەوتییەکانی هەرێمی کوردستان، سەردانی هەولێر دەکات و لێکۆڵینەوە لە چۆنییەتی هێرشەکان دەکات.

وێنە گەورەکە: لە مانگی ڕابردوودا بە چەند درۆنێک هێرشکراوەتە سەر ناوچە جیاوازەکانی هەرێمی کوردستان، هێرشەکان ژێرخانی ئابووری و وزەی کوردستان، دامەزراوە سەربازییەکان و فڕۆکەخانەکانی کردووەتە ئامانج، بەشێکی درۆنەکان لە کێڵگە نەوتییەکان کەوتوونەتە خوارەوە و زیانێکی زۆریان بە بەرهەمهینانی نەوت گەیاندووە، بەشێکیشیان خراونەتە خوارەوە.

لێدوانی فەرمی: لیوا عەبدولخالق تەڵعەت، نوێنەری حکومەتی ھەرێمی کوردستان لە فەرماندەیی ئۆپەراسیۆنی ھاوبەشی عێراق بە ئاڤای ڕاگەیاند: شەممەی داهاتوو لیژنەکی تایبەتمەند دەربارەی درۆنەکان و دەستنیشانکردنی ئاراستەی هاتنیان بۆ سەر کێلگە نەوتییەکانی هەرێمی کوردستان دەگاتە هەولێر، لیژنەکە ڕاستەوخۆ دەست بە لێکۆڵینەوە دەکات، تاوەکو پێویست بکات لە کوردستان دەمێننەوە و بەڵگەکان تۆمار دەکەن.

وتەی عەبدولخالق تەڵعەت، لیژنەکە لە هەواڵگریی عێراق و ئاسایشی نیشتمانی، بەڵگەی تاوان و چەند کەسێکی تایبەتمەند پێکدێن، پارچەی ئەو درۆنانە دەبینن کە ئاراستەی کوردستان کراون، ڕاپۆرتێک لەسەر ئەنجامی لێکۆڵینەوەکانیان ئامادە دەکەن، هەروەها لیژنەیەکی تایبەتمەند لە هەرێمی کوردستان لەگەڵیان دەبێت.

ئەوەی پێویستە بیزانیت: دوای ئامادەکردنی ڕاپۆرتەکەیان، ئەنجامەکەی دەگەیێنرێتە ئەو لیژنەیەی کە بە سەرۆکایەتیی قاسم ئەعرەجی، ڕاوێژکاری ئاسایشی نەتەوەیی عێراق، لەسەر پرسی هێرشە درۆنییەکان سەردانی هەولێری کرد.