پڕۆژەی ڕووناکی بۆ دابینکردنی کارەبای 24 کاتژمێری گەیشتە خورماڵ

ئاڤا نیوز

دوای ئەوەی لە ناوەڕاستی مانگی تەمموزدا تیمەکانی پڕۆژەی ڕوناکی گەیشتنە سەنتەری پارێزگای هەڵەبجە، کارەکانی پڕۆژەکە بە خێرایی بەڕێوەدەچێت و ئەمڕۆ تیمەکان گەیشتنە قەزای خورماڵ.

وێنە گەورەکە: پڕۆژەی ڕووناکی یان کارەبای 24 کاتژمێری یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان. ڕۆژی 25-7-2024 دەستیپێکرد و ڕۆژی 17-10-2024 مەسرور بارزانی، سەرۆکوەزیرانی کوردستان لە گەڕەکی شادی هەولێر پڕۆژەکەی ڕاگەیاند و ئامانجەکە ئەوەیە تا 2026 کارەبای تەواوی کوردستان ببێتە 24 کاتژمێری.

لێدوانی فەرمی: ئامانج محەممەد، لێپرسراوی کارەبای خورماڵ بەئاڤامیدیای ڕاگەیاند" تیمەکانی پڕۆژەی ڕوناکی لە خورماڵ دەستیان بە کارکردن کردووە لەسەر فیدەرەکانی 5، 6، 7، 8. هەروەها بڕیارە لە چەند ڕۆژی داهاتوودا کاری چاکسازی لە گۆڕەرەکانی کارەبادا تەواو ببێت. کارەکان لە هەڵەبجە و خورماڵ بە هاوبەشی و هاوکاتی بەڕێوەدەچێت بە مەبەستی خێراترکردنی پڕۆسەکە.

ئامانج محەممەد دەڵێت، هۆکاری هاتنی تیمەکان لە سەنتەری پارێزگای هەڵەبجەوە بۆ خورماڵ ئەوەیە کە لە ناوەندی پارێزگاکەدا تەنها 17 فیدەری کارەبا هەیە، ئەمەش بە بەراورد بە شارێکی گەورەی وەک سلێمانی کە نزیکەی 500 فیدەری هەیە، ژمارەیەکی کەمە و کارەکان خێراتر بەڕێوەدەچن.

ئەوەی پێویستە بیزانیت: لە سنووری پارێزگای هەڵەبجە زیاتر لە 42 هەزار هاوبەشی کارەبا هەن کە لەم پڕۆژەیە سوودمەند دەبن. قەزای خورماڵ 12 فیدەری کارەبای هەیە و دوای تەواوبوونی کارەکان لەم قەزایە، تیمەکانی پڕۆژەی ڕوناکی بەرەو ناوچەی هەورامان بەڕێدەکەون بۆ جێبەجێکردنی هەمان پڕۆژە.