مەشهەدانی: ئەنفالکردنی بارزانییەکان تاوانێکە لێخۆشبوونی نییە

ئاڤا نیوز

مەحموود مەشهەدانی، سەرۆکی پەرلەمانی عێراق، لە 42ـەمین ساڵیادی، ئەنفالكردنی هەشت هەزار بارزانیدا پەیامێكی بڵاوكردەوە و دەڵێت: " بە دڵێکی پڕ لە خەم و پەژارەوە یادی ئەو ستەم و کۆمەڵکوژییە دەکەینەوە".

وێنە گەورەكە: 31 -7- 1983، ڕژێمی بەعس لە هەڵمەتێکی ڕێکخراودا، هەشت هەزار بارزانی لە مێردمنداڵ،گەنج، پیاو و بەساڵاچوو لە کۆمەڵگە زۆرەملێکانی قوشتەپە،بەحرکە ،دیانا و هەریر دەستگیرکرد، دواتر بە شێوەیەکی کۆمەڵ ئەوانی بۆ بیابانەکانی باشووری عێراق گواستەوە و لەوێ بە زیندوویی زیندەبەچاڵی کردن.

پەیامی فەرمی: مەحموود مەشهەدانی، سەرۆکی پەرلەمانی عێراق، لە پەیامەكەیدا ڕایگەیاند: ئیدانەی ئەو تاوانە دەکەین کە لە جینۆسایدەی شاڵاوی ئەنفالی بارزانییەکان ئەنجامدرا و بە یەکێک لە گەورەترین تاوانەکان لە مێژووی عێراقدا لە قەڵەمی دەدەین.

بە دڵێکی پڕ لە خەم و پەژارەوە، یادی ئەو ستەم و دەستدرێژییە دەکەینەوە و هەمیشە ئیدانەی دەکەین، لە دیمەنێکی نائەخلاقیدا خوێنی هەزاران مرۆڤی بێتاوان بەبێ هیچ پاساوێک حەڵاڵ کرا، ئەوەش تاوانێکە لە مێژووی عێراقدا لێخۆشبوونی نییە."

ویژدانی مرۆڤایەتیی هیچ هەڵوێستێکی بەرامبەر کۆمەڵکوژی، ڕاگواستنی زۆرەملێ و سڕینەوەی ناسنامە و چەندەها تاوانی دیکەی دژ بە بارزانییەکان نەبوو، ئەمەش بەڵگەیەکی حاشاهەڵنەگرە سەبارەت بە سەردەمێکی ڕەشی ستەمکاری و دیکتاتۆری کە نابێت دووبارە ببێتەوە.
 

گەرمترین پرسە و سەرەخۆشی و هاوخەمیی خۆمان ئاراستەی سەرکردایەتیی کورد، بەتایبەتیش برایانی بارزانی و سەرجەم ڕۆڵەکانی گەلی بەڕێزی کوردستان دەکەین.