"جەللادەکە"ـی بەندینخانەی "نوگرە سەلمان"ـی سەردەمی بەعس دەستگیر کرا

ئاڤا نیوز

ئەو "جەللادە"ـی سەدان منداڵ، ئافرەت و پیاوی کوردی لە زیندانیی "نوگرە سەلمان" لە باشووری عێراق لە سەردەمی بەعسی ڕووخاو کووشتوە و زیندەبەچاڵی کردوون، دوای دەیان ساڵ دەکەوێتە دەستی هێزە ئەمنییەکان عێراق و دەستگیر دەکرێت.

چیرۆکی سەرەکی: بە درێژایی 22 ساڵی ڕابردوودا، یەکێک لە دیارترین ئەو تۆمەتبارانەی تاوانی ئەنفال و زیندەبەچاڵکردنی بەرامبەر بە هاونیشتیمانییانی کورد ئەنجامداوە هەڵهاتووە و بۆ ئەوەی دەزگا ئەمنییەکان بەلاڕێدا ببەن، بنەماڵەکەی بانگەشەی ئەوەیان کردبوو گیانی لەدەستداوە، دوای ئاشکرابوونی، لەلایەن دەزگای ئاسایشی نیشتمانیی عێراق دەستگیر کرا.

ڕاگەیێنراوی فەرمی: دەزگای ئاسایشی نیشتمانی عێراق ڕایگەیاند: دوای لێکۆڵینەوەیەکی وردی هەواڵگریی کە زیاتر لە شەش مانگی خایاند، مەفرەزەکانی دەزگای ئاسایشی نیشتمانی لە پارێزگای موسەننا بە هەماهەنگی لەگەڵ ئاسایشی باشووری پارێزگای سەڵاحەددین، توانیان عەجاج ئەحمەد حەردان ناسراو بە (حەجاج نوگرە سەلمان)، یەکێک لە جەللادە داواکراوەکانی ڕژێمی پێشووە کە هەڵهاتبوو، دەستگیر بکەن، کە پێشتر پۆستی ئەفسەری ئەمنی زیندانی بەناوبانگی نوگرە سەلمان بووە.

زانیاریی زیاتر: لە سەردەمی بەعس، تۆمەتبار چەندین تاوانی دژ بە مرۆڤایەتیی بەرامبەر بە سەدان هاووڵاتی کورد و عێراقی ئەنجامداوە، بەتایبەتی ئەو کوردانەی کە بە زۆرەملێ گواسترابوونەوە بۆ زیندانیی نوگرە سەلمان لە پارێزگای موسەننا، تۆمەتبار ئەو منداڵ، ئافرەت و پیر و پیاوە کوردانەی لەو زیندانە ئەشکەنجەداوە و کوشتوونی و لەسێدارەی داون، بەشداربووە لە زیندەبەچاڵکردنیان و دەستدرێژی سێکسی کردووەتە سەر ئافرەتان.

ئەوەی پێویستە بیزانیت: پێشتر تۆمەتبار چەندین پۆستی ئەمنی هەبووە، لەوانە؛ ئەفسەری ناوچەی پارێزگای موسەننا و ئەفسەری ناوچەی نوگرە سەلمان، ئەفسەری ناوچەی ڕومێسە و چەند ناوچەیەکی دیکە.