عێراق هەزاران دەرفەتی دامەزراندن ڕادەگەیێنێت؛ هەرێمی كوردستانیش دەگرێتەوە

ئاڤا نیوز

وەزارەتی ناوخۆی حكومەتی فیدراڵ، دەرگای پێشكەشكردن بۆ دامەزراندن لە هەردوو پەیمانگەی پێگەیاندنی ڕێپێدراو (مفەوەز)ـی پۆلیس و پەیمانگەی باڵای گەشەپێدانی ئەمنی و كارگێڕی كردەوە، هەڵگرانی بڕوانامەی بەكالۆریۆس لە سەرجەم پارێزگاكانی عێراق بە هەرێمی كوردستانیشەوە دەتوانن تاوەكو 10 ڕۆژ داواكاری پێشكەش بكەن.

ڕاگەیێنراوی فەرمی: وەزارەتی ناوخۆی عێراق لە ڕاگەیێنراوێكدا ئاماژەی بەوە كردووە، داواكاریی بۆ بەشداریكردن لە خولی (12)ـی پەیمانگەی پێگەیاندنی مفەوەزی پۆلیس، لە ئەمڕۆ هەینییەوە دەستپێدەكات تاوەكو 2025-08-10، كە هەزار كەس وەردەگرێت لە دەرچووانی پۆلی نۆیەمی بنەڕەتی، بەو مەرجەی دەرچووانی ساڵی خوێندنی (2023-2024) و (2024-2025) بن و تەمەنیان لە 16 ساڵ كەمتر نەبێت و لە 21 ساڵ زیاتر نەبێت.

هاوكات داواکاریی بۆ بەشداریکردن لە خولی (31)ـی پەیمانگەی باڵای گەشەپێدانی ئەمنی و كارگێڕی، بەهەمان شێوە ئەمڕۆ هەینی دەستپێدەکات و تاوەکو 10ـی ئەم مانگە بەردەوام دەبێت، ئەویش بەهەمان شێوە هەزار كەس وەردەگرێت و دوای تەواوكردنی خوێندنی پەیمانگەكە، خوازیاریی دەرچوو لە یەكێك لە فەرمانگەكانی وەزارەتی ناوخۆی عێراق دادەمەزرێت. بەو مەرجەی پێشكەشكار، خاوەنی بڕوانامەی بەكالۆریۆس بێت و تەنیا دەرچووانی ساڵی خوێندنی (2023-2024) و (2024-2025) وەردەگیرێن كە داواكارییەكان لەڕێگەی پێگەیەكی ئەلیكترۆنی كە لە ئاڤا نیوز دانراوە، پێشكەش دەكەن.

زانیاریی بەدەستهاتوو: هاووڵاتیانی هەرێمی كوردستان دەتوانن داواكاریی لە هەردوو پەیمانگەكە پێشكەش بكەن، بەڵام دوای تەواوكردنی پەیمانگەكە، شوێنی كاركردنییان لە ناوچەكانی ژێر دەسەڵاتی حكومەتی فیدراڵ دەبێت بەپێی پێویستی میلاكاتی وەزارەتی ناوخۆی عێراق.

مەرجەكان: پێشكەشكاران بۆ پەیمانگەی پێگەیاندنی ڕێپێدراوی پۆلیس، تەنها لە ڕەگەزی نێر دەبێت، كە پێویستە تەمەنی پێشكەشكار لە 16 ساڵ كەمتر نەبێت و لە 21 ساڵ زیاتر نەبێت و لانیكەم دەرچووی قۆناغی نۆی بنەڕەتی بێت.

پێشكەشكاران بۆ پەیمانگەی باڵای گەشەپێدانی ئەمنی و كارگێڕی، لە هەردوو ڕەگەزی نێر و مێ دەبن، كە پێویستە تەمەنیان لە 22 ساڵ كەمتر نەبێت و لە 25 ساڵ زیاتر نەبێت و هەڵگری بڕوانامەی بەكالۆریۆس بن.

جگە لە لەبەرچاوگرتنی درێژی باڵا و پانی سنگ و نەبوونی هیچ جۆرە نەخۆشییەكی جەستەیی كە كاریگەری لەسەر ئەركی وەزیفی دروست بكات.
  
بەستەری پێشكەشكردن بۆ پەیمانگەی باڵا

بەستەری پێشكەشكردن بۆ پەیمانگەی ڕێپێدراوی پۆلیس