سوودانی: ئەنفالی بارزانییەکان بەڵگەیەکی ڕوونە لەسەر دیکتاتۆریەت و تاوانکاریی ڕژێمی ڕووخاو

ئاڤا نیوز

لە 42ـیەمین ساڵیادی ئەنفالکردن و زیندەبەچاڵکردنی هەشت هەزار بارزانی، محەممەد شیاع سوودانی، سەرۆکوەزیرانی عێراق پەیامێكی بڵاوکردەوە و تێیدا سەرەخۆشی و هاوسۆزیی خۆی بۆ سەرۆک بارزانی و بارزانییەکان دەربڕی و وتی؛  ئەو تاوانە بەڵگەیەکی ڕوونە لەسەر دیکتاتۆریەت و تاوانکاریی ڕژێمی ڕووخاوی سەدام حوسێن و بەعس.

وێنە گەورەکە: 31ـی تەممووزی 1983، ڕژێمی بەعس لە هەڵمەتێکی ڕێکخراودا، هەشت هەزار بارزانی لە مێردمنداڵ، گەنج، پیاو و بەساڵاچوو لە کۆمەڵگە زۆرەملێکانی قوشتەپە، بەحرکە، دیانا و هەریر دەستگیر کرد. دواتر بە شێوەیەکی کۆمەڵ ئەوانی بۆ بیابانەکانی باشووری عێراق گواستەوە و لەوێ بە زیندوویی زیندەبەچاڵ کران.

پەیامی فەرمی: محەممەد شیاع سوودانی، سەرۆکوەزیرانی عێراق لە تۆڕی "ئێکس" ڕایگەیاند: یادی 42 ساڵەی هەڵمەتە دڕندانەکانی ئەنفال دەکەینەوە، کە تێیدا پیر و منداڵ و ژن و گەنجانی خێزانە بارزانییە بەڕێزەکان کرانە ئامانج، لەو هەڵمەتانە هەشت هەزار کەسیان بە شێوەیەکی تاوانکارانە و نامرۆڤانە بێسەروشوێنبوون، ئەمەش بەڵگەیەکی ڕوون بوو لەسەر دیکتاتۆریەت و تاوانکاریی ڕژێمی ڕووخاو.

"بەم بۆنەیەوە سەرەخۆشی و هاوسۆزیی خۆمان ئاڕاستەی برایانی بارزانی و لەپێش هەموویانەوە بەڕێز مەسعود بارزانی دەکەین، بۆ ئەو خوێنە پاکانەی کە لەگەڵ خوێنی هەموو عێراقییەکاندا، بووە مایەی ڕزگاربوونمان لەو سەردەمە تاریکە و گەیشتن بە ئازادی و دادپەروەری لە سایەی سیستمە دیموکراسییەکەماندا".