تاڵیبان دەیەوێت پەنابەرە ئەفغانییەكان لەئەوروپاوە بگەڕێنێتەوە

ئاڤا دیجیتاڵ

نوێنەری یەكێتی ئەوروپا و نوێنەری حكومەتی تاڵیبان لە كابوڵ كۆبوونەوە، بۆ قسەكردن لەسەر پەنابەرە وئاوارەكانی ئەفغانستان، تاڵیبان دەیەوێت لەگەڵ وڵاتانی ئەوروپا ڕێككەوتن بكات تا پەنابەرە ئەفغانییەكان بگەڕێنێتەوە.

چیرۆكە سەرەكییەكە: بۆ یەكەمجار دوای رووخانی حكومەتی ئەفغانستان، ئەمڕۆ لە كابووڵ نوێنەری یەكێتی ئەوروپا و نوێنەری حكومەتی تاڵیبان كۆبوونەوە، بۆ دۆزینەوەی میكانیزمێک بۆ گەڕانەوەی ئەو پەنابەر و ئاوارانەی كە ڕوویان لە ئەوروپا كردووە.

بابەتە ستراتیژییەكان: ئەم كۆبوونەوەیە بۆ قسەكردن بووە لەسەر گەڕانەوەی ئەو پەنابەرانەی لە ئەفغانستانەوە ڕوویان لە وڵاتانی یەكێتی ئەوروپا كردووە، هەروەها میكانیزمێك رێكدەخرێت كە هەموو لایەنەكان پێكەوە بتوانن كارێک بكەن بەشێكی زۆر لە ئاوارە و پەنابەرەكانی ئەو وڵاتە بگەڕێننەوە.

ئەوروپا نیگەرانە لەو ژمارە زۆرەی پەنابەران كە ڕوویان لە ئەوروپا كردووە، بۆیە لەگەڵ حكومەتی تاڵییباندا لە گفتوگۆ و لێكتێگەیشتندان بۆ گەڕانەوەی ئەو هاووڵاتییە ئەفغانیانەی  ڕوویان لە ئەوروپا كردووە، بەڵام بەمیكانیزمێكی گشتگیر و ورد.

رێككەوتنەكە بەم شێوەیەیە: ئەوروپا ئەو پەنابەرانە دەنێرێتەوە كە لە ئەفغانساتنەوە ڕوویان لە ئەوروپا كردووە، بەڵام دەبێت رێوشوێنێكی باش بگیردرێتەبەر بۆ گەڕاندنەوەیان و مافیان پارێزراوبێت، تاڵیبانیش ئەمەی قبوڵە بەمەرجێك، نوێنەرایەتی خۆیان لە ئەوروپا بكەنەوە و دانیان پێدابنرێت وەك حكومەتێكی فەرمیی.

باگراوند: لە ناوەڕاستی ساڵی 2022 ئەمریكا بە فەرمانی جۆ بایدن، بەتەواوەتی لە ئەفغانستان كشایەوە، دواتر بزووتنەوەی تاڵیبان بەتەواوەتی كۆنترۆڵی ئەو وڵاتەی كرد.