نەتەوە یەکگرتووەکان: شەش هەزار بارهەڵگری هاوکارییەکان لەدەرەوەی غەززە گیریان خواردووە

ئاڤا نیوز

ڕێکخراوی ئاژانسی نەتەوە یەکگرتووەکان بۆ کاروباری پەنابەرانی فەلەستینی (ئۆنروا) ڕایگەیاند، نەتەوە یەکگرتووەکان نزیکەی شەش هەزار بارهەڵگری یارمەتییە خۆراکیی هەیە لە دەرەوەی غەززە گیریان خواردووە و چاوەڕێی ڕەزامەندی دەکەن بۆ چوونە ناو کەرتی غەززە لە فەلەستین.

ڕاگەیێنراوی فەرمی: فیلیپی لازارینی، سەرۆکی رێکخراوی ئاژانسی نەتەوە یەکگرتووەکان بۆ کاروباری پەنابەرانی فەلەستینی ڕایگەیاند، لە سەرەتای ئەمساڵدا، پێش ئەوەی ئیسرائیل  لە 18ـی ئازاردا ئاگربەست کۆتایی پێبێنێت "نەتەوە یەکگرتووەکان لە ماوەی ئاگربەستەکاندا ڕۆژانە لە نێوان 500 بۆ 600 بارهەڵگری هاوکارییەکانی دەبردە ناوەوەی غەززەوە".

زانیاریی زیاتر: ماوەی پێنج مانگە ئیسرائیل گەمارۆی تەواوی کەرتی غەززەی داوە و بەشێوەیەکی سنووردار نەبێت ڕێگە نادات هاوکارییە مرۆییەکان بگەنە نێو کەرتەکە، بەم هۆیەشەوە سەدان کەس لە برسان مردوون و کۆی گشتیی دانیشتوانی کەرتەکە کە نزیکەی دوو ملیۆن و 400 هەزار کەس ڕووبەڕووی برسێتی و بەدخۆراکی بوونەتەوە.