سەرۆکایەتیی کۆمار لەبارەی ئەنفالی بارزانییەکان: یەکێکە لە قێزەونەترین تاوانەکانی مێژووی نوێی عێراق

ئاڤا نیوز

سەرۆکایەتیی کۆماری عێراق هاوخەم و هاوسۆزیی خۆی بۆ کەسوکاری قوربانییانی ئەنفالی بارزانییەکان دەربڕی و بە دڕندەترین تاوانەکانی سەردەمی نوێ وەسفی کرد، هاوکات پابەندبوونی خۆی بۆ چارەسەرکردنی پرسەکانی مووچە و نەوت لەنێوان هەولێر و بەغدا دووپات کردەوە.

وێنە گەورەکە: 42 ساڵ لەمەوبەر، ڕژێمی بەعس لە هەڵمەتێکی ڕێکخراودا، هەشت هەزار بارزانی لە مێردمنداڵ، گەنج، پیاو و بەساڵاچوو لە کۆمەڵگە زۆرەملێکانی قوشتەپە، بەحرکە، دیانا و هەریر دەستگیر کرد. دواتر بە شێوەیەکی بە کۆمەڵ بۆ بیابانەکانی باشووری عێراق گواستینەوە و لەوێ بە زیندوویی زیندەبەچاڵ کران.

ڕاگەیێنراوی فەرمی: سەرۆکایەتیی کۆماری عێراق ڕایگەیاند: ئەم تاوانە قێزەونە کە لە لایەن ڕژێمی دیکتاتۆری لەناوچووی بەعسەوە ئەنجام دراوە، یەکێکە لە ترسناکترین جۆرەکانی ستەم و جینۆساید لە سەردەمی مۆدێرندا و دەبێت لە یادەوەری نیشتمانیی بمێنێتەوە، ئەنجامدەرانی و ئەوانەی دەستیان بە خوێنی بێتاوانەکان سوورە دەبێت ڕووبەڕووی دادپەروەریی یاسا و مێژوو ببنەوە.

گۆشەیەکی دیکەی دیمەنەکە: لە کاتێکدا ئەمڕۆ ئەم تاوانە قێزەونەمان وەبیر دێنینەوە، پابەندبوونی ئەخلاقی و دەستووری خۆمان نوێ دەکەینەوە بۆ پشتیوانیکردن لە مافە ڕەواکانی گەلی کوردستان و هەموو پێکهاتەکانی گەلی عێراق و بە پەرۆشەوە کارکردن بۆ چارەسەرکردنی کێشە هەڵپەسێردراوەکان، لە پێش هەموویانەوە پرسی مووچە و نەوت و غاز لە نێوان حکومەتی فیدراڵی و حکومەتی هەرێمی کوردستان.