زیاتر لە 36 ملیۆن هاووڵاتی فۆڕمی ئەلیکترۆنی پسوولەی خۆراکیان پڕکردۆتەوە

ئاڤا نیوز


وەزارەتی بازرگانی عێراق، ڕایگەیاند بەمەبەستی نوێکردنەوەی فۆڕمی خۆراک و بە ئەلیکترۆنیکردنی، زیاتر لە 36 ملیۆن هاووڵاتی خۆیان تۆمارکردووە.

وێنە گەورەکە:  لە ماوەی ڕابردوو وەزارەتی بازرگانی و پێشەسازیی عێراق، بڕیاری بە ئەلیکترۆنیکردنی فۆڕمی خۆراکی مانگانەی هاووڵاتییان دا، سەرەتا لە پارێزگاکانی عێراق دەستپێکرد و دواتر لە پارێزگای هەڵەبجە وەکو یەکەم پارێزگاکانی هەرێمی کوردستان دەستپێکرد، پاشان لە هەولێر و سلێمانی و دهۆک دەستپێکردوو.

لێدوانی فەرمی: محەممەد حەنوون، وتەبێژی وەزارەتی بازرگانی و پێشەسازی عێراق، ڕایگەیاندووە، ژمارەی ئەو هاووڵاتییانەی بەشێوەی ئەلیکترۆنی داتاکانیان نوێکردۆتەوە، لە پلاتفۆرمی وەزارەتی بازرگانی و لایەنی پەیوەندیدار، فەرمانگەی پلانان و بەدواداچوون، گەیشتووەتە زیاتر لە 36 ملیۆن کەس، ئەمەش بەشێکە لە هەوڵەکان بۆ نوێکردنەوەی هەمەلایەنەی تۆماری هاووڵاتییان، دوای ئەم پرۆسەیە کەرتی ئەلیکترۆنی بۆ بریکارەکانيش لە سەرانسەری هەموو ناوچەکانی عێراق دەستپێدەکات.

زانیاریی زیاتر: محەممەد حەنوون، دەڵێت، لەئێستا دا هەموو ڕێکارەکانی سڕینەوە، زیادکردن، کردنەوەی بلۆککردن و گواستنەوە بە شێوەیەکی کاتی ڕاگیراون، وەک بەشێک لە پێداچونەوەی ڕێکخستن بۆ دڵنیابوون لە وردی داتاکان و ڕێگریکردن لە دووبارەبوونەوە یان دەستکاریکردن.

ئەوەی پێویستە بیزانیت: نوێكردنەوەی داتاکان سەرجەم پارێزگاکانی عێراق دەگرێتەوە، بە پارێزگاكانی هەرێمی کوردستانیشەوە، هاوکات هەرێمی کوردستان کە ئاستێکی پێشکەوتووی تەواوکردنیان بەدەستهێناوە لە نوێکردنەوەی داتاکانیان، بۆ زامنكردنی گشتگیری بنكەی زانیاری (داتابەیسی) نیشتمانی و بەدیهێنانی دادپەروەری لە دابەشکردنی خزمەتگوزاری و شایستەییەکان.