سەرۆکایەتیی پەرلەمانی عێراق بەشێکی زۆری پەرلەمانتاران سزا دەدات

ئاڤا نیوز

سەرۆکایەتیی پەرلەمان بڕیاریدا ئەو پەرلەمانتارانەی کە لە دانیشتنەکی ئەمڕۆ ئامادەنەبوون بڕی یەک ملیۆن دینار لە مووچەکانیان ببڕێت.

چیرۆکی سەرەکی: بڕیاربوو ئەمڕۆ شەممە پەرلەمان کۆببێتەوە و دەنگ لەسەر پڕۆژەیاسای هەمواری دووەمی یاسای دامەزراوەی زیندانییە سیاسییەکان و ئازادیی ڕادەربرین و خۆپیشاندان و چەندین پرۆژەیاسای دیکە بدات، بەڵام لەکۆی 329 پەرلەمانتار 164 پەرلەمانتار بێ مۆڵەت ئامادەنەبوون و ڕێژەی یاسایی ئامادەبوون تەواو نەبوو و دانیشتنەکەش بۆ کاتێکی نادیار دواخرا، سەرۆکایەتییش بڕیاریدا ئامادەنەبووان سزا بدات.

ڕاگەیێنراوی فەرمی: موحسین مەندەلاوی، جێگری یەکەمی سەرۆکی پەرلەمانی عێراق فەرمانی کرد ئەو پەرلەمانتارانەی ئامادەی دانیشتنەکەی ئەمڕۆ نەبوون ناوەکانیان لە ماڵپەڕی پەرلەمان بڵاوبکرێتەوە و یەک ملیۆن دیناریش لە مووچەکانیان ببڕدرێت.

زانیاریی زیاتر: ئەم ڕێکارەی سەرۆکایەتیی پەرلەمان بۆ کەمکردنەوەی دیاردەی ئامادەنەبوونی پەرلەمانتارانە کە لە ماوەی ڕابردوودا چەندین دانیشتن بەهۆی تەواونەبوونی ڕێژەی ئامادەبوونی یاسایی پەرلەمانتاران دواخراون.