ئیسرائیل: تاوەکو بارمتەکان ئازاد نەکەین جەنگ ڕاناگرین

ئاڤا نیوز

تا دێت دۆخی مرۆیی کەرتی غەززە خراپتر دەبێت و ئیسرائیلیش لە دوایین پیشهاتدا دەڵێت، تاوەکو سەرجەم بارمتەکانمان ئازاد نەکەین جەنگ ڕاناگرین.

وێنە گەورەکە: سەڕەرای دانوستانەکانی نێوان ئیسرائیل و حەماس بۆ کۆتاییهێنان بە جەنگی غەززە، بەڵام ئیسرائیل بەردەوامە لە بۆردوومان کردن و برسیکردنی خەڵکی غەززە و بەهۆیەوە سەدان هەزار کەس کوژراون و برینداربوون.

لێدوانی فەرمی: ئیال زامیر، سوپاسالاری سوپای ئیسرائیل ڕایگەیاند: ''شەڕ لە غەززە بەبێ پشوودان بەردەوام دەبێت، تاوەکو سەرجەم بارمەتەکانی ئیسرائیل ئازاد نەکرێن و نەگەین بە ڕێککەوتنێکی گشتگیر''. لە چەند ڕۆژی داهاتوودا بۆمان ڕوون دەبێتەوە ئایا دەگەینە ڕێککەوتن بۆ ئازادکردنی بارمتەکان یاخود نا.

ئەوەی پێویستە بیزانیت: ئەم لێدوانانەی زامیر لە کاتێکدایە کە دانوستانەکانی ئیسرائیل و حەماس چەقبەستوو بوون و نەگەیشتوون بە هیچ ئەنجامێک، هاوکات نێردەی تایبەتی دۆناڵد ترەمپ، سەرۆکی ئەمریکا بۆ ڕۆژهەڵاتی ناوەڕاست دووپاتیکردەوە، هیچ سەرکەوتنێک بەبێ ئازاد کردنی بارمتەکان نییە.