هیندستان سەرەڕای فشارەکانی ترەمپ لە کڕینی نەوتی ڕووسی بەردەوام دەبێت

ئاڤا نیوز

وەزارەتی دەرەوەی هیندستان لە وەڵامی گوشار و لێدوانەکانی واشنتن بۆ دوورکەوتنەوە لە کڕینی نەوتی ڕووسی ڕایدەگەیەنێت، هیچ دەوڵەتێک مافی دەستوەردانی لە سیاسەتی هیندستان نییە.

چیرۆکی سەرەکی: سەرەڕای باجی ئەمریکا بەڕێژەی 25% لەسەر هەناردەکانی هیندستان بۆ ئەمریکا، ترەمپ لە پۆستێکی "تروس سۆشیاڵ" لە مانگی ڕابردوودا ئاماژەی بەوەدا کە هیندستان ڕووبەڕووی سزای زیاتر دەبێتەوە بەهۆی کڕینی چەک و نەوتی ڕووسی.

لێدوانی فەرمی: ڕاندهیر جەیسواڵ، وتەبێژی وەزارەتی دەرەوەی هیندستان لە کۆنگرەیەکی رۆژنامەوانیدا وەڵامی ترەمپی دایەوە و  ڕایگەیاند: هیندستان وڵاتێکی سەربەخۆیە و داڕێژەری سیاسەتی دەرەوەی خۆیەتی و بڕیار دەدات پەیوەندی دیپلۆماسی و بازرگانی لەگەڵ هەر دەوڵەتێک هەبێت کە لە بەرژەوەندی وڵات بێت، مافی دەوڵەتی سێیەم نییە دەستوەردان بکات لەم سیاسەتە، پەیوەندی نێوان ڕووسیا و هیندستان پەیوەندیەکی مێژوویی و جێگیرە و بە پێی سیاسەتی دەرەوەمان بەردەوام دەبین لەم پەیوەندییە.

زانیاریی زیاتر: میدیاکانی هیندستان لە زاری بەرپرسانی نیودلهیەوە ڕایانگەیاند، هیندستان بەردەوام دەبێت لە کڕینی نەوتی ڕووسی و داوا لە دۆناڵد ترەمپ، سەرۆکی ئەمریکا دەکەن هیندستان تێوەنەگلێنێت لە ناکۆکیەکانیان لەگەڵ ڕووسیا.