نووری مالیکی دڵنیایی لەسەر تەندروستیی خۆی دەدات و پەیامێک ئاراستەی "نەیارەکانی" دەکات

ئاڤا نیوز

سەرۆکی هاوپەیمانیی دەوڵەتی یاسا، لە پەیامێکی دەنگیدا دڵنیایی دایە لایەنگرانی لەبارەی باشبوونی ڕەوشی تەندروستییەوە دوای تووشبوونی بە نەخۆشی. هاوکات لە پەیامەکەیدا، بە تووندی هێرشی کردە سەر ئەو کەسانەی کە بە نەخۆشکەوتنی دڵ خۆش بوونە و جەختیشی کردەوە کە بە نزای خەڵک و بە ویستی خودا بە تەواوی چاک بووەتەوە.

وێنە گەورەکە: دوای بڵاوبوونەوەی چەند دەنگۆیەک لەبارەی تێکچوونی باری تەندروستییەوە، نووری مالیکی، سەرۆکی هاوپەیمانیی دەوڵەتی یاسا، پەیامێکی دەنگیی بڵاوکردەوە و تیایدا هەم سوپاسی ئەو کەسانەی کرد کە هەواڵیان پرسیوە، هەمیش وەڵامی نەیارەکانی دایەوە.

پەیامی دەنگی: لە سەرەتای پەیامەکەیدا، مالیکی سوپاسی خوای کرد کە تەندروستیی پێ بەخشیوەتەوە و وتی: "سوپاس و پێزانین و ڕێزی زۆرم هەیە بۆ هەموو ئەو برا و خوشکانەی کە هەواڵی تەندروستییان پرسیم و پەیوەندییان پێوە کردم یان لە ماڵەکەمدا سەردانیان کردم."

ناوبراو دڵنیایی دا کە ئێستا تەندروستیی زۆر باشە و بە سەلامەتی لەو نەخۆشییە دەرچووە، وتیشی: "تەندروستیم باشە و سوپاس بۆ خوا، هیچ ئاسەوارێکی ئەو نەخۆشییەی کە تووشم بووە، نەماوە."

مالیکی لە بەشێکی دیکەی قسەکانیدا، بەبێ ناوبردنی هیچ لایەنێک، پەیامێکی تووندی ئاراستەی ئەو کەسانە کرد کە دڵخشبوونە بە نەخۆشکەوتنی وتی: بەوانە دەڵێم کە دەیانەوێت گاڵتەم پێ بکەن، گاڵتە بە نەخۆشیی ناکرێت. بەڵکو ئەوە گرێیەکە لە دەروونی ئەو کەسانەدایە کە درۆ دەکەن تا بە درۆکانیان گاڵتە بکەن."

هەروەها وتی: "با ڕق لێبووەکان بە ڕقەکەیانەوە بڕۆن، بەڵام ئەو ڕقە هیچیان بۆ ناگۆڕێت، چونکە خوای گەورە و بە بەرەکەتی نزای برا و خوشکانم، شیفای تەواوی پێ بەخشیم."

لە کۆتاییدا، مالیکی سوپاسی ئەو پزیشکانەی کرد کە سەرپەرشتیی چارەسەرەکەیان کردووە و بە جۆرێک لە بەزەییەوە وتی، "بەزەییم بەو ڕق لێبووانەدا دێتەوە کە لەسەر ڕووداوی لەم شێوەیە دەژین."