لە هەولێر ماڵێک بۆ حەیرانبێژان کرایەوە

ئاڤا نیوز

دوای ساڵانێکی زۆر لە چاوەڕوانی، دواجار دەرگای ماڵێک بۆ حەیران و حەیرانبێژان لە شاری هەولێر کرایەوە. ئەم ناوەندە کولتوورییە کە بە ناوی هونەرمەندی کۆچکردوو "حەسەن حەیران"ـەوە ناونراوە، بووەتە یەکەم شوێنی تایبەت بە کۆکردنەوە و پاراستنی ئەم هونەرە ڕەسەنە کوردییە لە پایتەخت، کە تێیدا حەیرانبێژان دەتوانن یاد و بەرهەمەکانیان زیندوو بکەنەوە.

چیرۆکی سەرەکی: بۆ یەکەمجار لە مێژووی شاری هەولێردا، ناوەندێکی تایبەت بە حەیران بە ناوی "ماڵی حەسەن حەیران" کرایەوە، کە پێشتر حەیرانبێژان شوێنێکی شایستەیان نەبوو تێیدا کۆببنەوە و گرنگی بە هونەرەکەیان بدەن. کردنەوەی ئەم ماڵە وەک هەنگاوێکی گرنگ بۆ پاراستنی حەیران لە فەوتان سەیر دەکرێت و بووەتە جێی دڵخۆشیی هونەرمەندان و هونەردۆستان.

لێدوانی فەرمی: ئەمیر حەسەن حەیران، کە سەرپەرشتیاری ماڵەکەیە، بە ئاڤای وت: "زۆر سوپاسی بەڕێز سەرۆک وەزیران دەکەین کە خەمخۆری ئەم بابەتە بوون و ئەم شوێنە جوان و شایستەیەیان بۆ دابین کردین تا ببێتە ماڵی هەموو حەیرانبێژانی کوردستان."

ئەوەی پێویستە بیزانیت: یەکێک لە تایبەتمەندییە سەرنجڕاکێشەکانی ماڵەکە، شێوازی دیزاین و ڕازاندنەوەکەیەتی، ناو ماڵەکە بە شێوازێکی تەقلیدی و کولتووریی کۆن ڕازێندراوەتەوە، کە هەر لەگەڵ چوونە ژوورەوە، سەردانکەر دەباتەوە بۆ یادەوەرییەکانی هەولێری دەیەی شەست و حەفتاکان و هەستێکی ڕەسەنایەتی و خنجیلانەی پێ دەبەخشێت.

پەیامێک لە حەیرانبێژانەوە:

لە پەراوێزی کردنەوەی ماڵەکەدا، ژمارەیەک لە حەیرانبێژان پەیامێکیان ئاراستەی عوبەید هەرکی، پەیامنێری کەناڵی ئاڤا میدیا و میدیاکارانی تر کرد و وتیان: "زۆر پێمان خۆشە و حەز دەکەین، ئەوانەی سەردانی ئێرە دەکەن، بەتایبەت ئێوەی میدیاکاران، بە جلی کوردییەوە بێن. ئەم ماڵە هێمای ڕەسەنایەتییە و جوانترە بە جلوبەرگی کوردییەوە ڕێزی لێ بگیرێت.

ئەم داواکارییە سادەیە، نیشاندەری ئەو پەیوەندییە قووڵەیە کە هونەرمەندانی حەیران لەگەڵ کولتوور و ڕەسەنایەتی خۆیاندا هەیانە و دەیانەوێت ئەو هەستە بۆ نەوەکانی داهاتووش بگوازنەوە.