دوای 15 ساڵ دابڕان، ئەساڵە نەسری دەگەڕێتەوە سووریا

ئاڤا نیوز

گۆرانیبێژی ناسراوی سووری، ئەساڵە نەسری ڕایدەگەیێنێت، ئامادەکاری دەکات بۆ گەڕانەوە بۆ سووریا لە کۆتایی مانگی ئابی ئەمساڵدا، دوای دابڕانێک کە ماوەی 15 ساڵی خایاند.

لێدوانی فەرمی: گۆرانیبێژی ناسراوی سووری، ئەساڵە نەسری لە میانی کۆنگرەیەکی ڕۆژنامەوانیدا لە چوارچێوەی بەشداریکردنی لە فێستیڤاڵی جەرەش لە ئوردن ڕایگەیاند، ئەم گەڕانەوەیە "هەنگاوێکە بۆ سارێژکردنی برینی دابڕان و دڵدانەوەی ئەو هەوادارانەی کە ساڵانێکی زۆر چاوەڕێی بوون."

ناوبراو بەڵێنی دا کە قەرەبووی "ئازارەکانی ئەو دابڕانە درێژخایەنە" بکاتەوە. هاوکات جەختی لەوە کردەوە کە ئەندامێتییەکەی لە سەندیکای هونەرمەندانی سووریا "وەک ناسنامە وایە" و سەرەڕای دوورکەوتنەوەی لە گۆڕەپانی هونەریی سووریا، هەمیشە پێوەی پابەند بووە.

ئەوەی لەوبارەیەوە دەگوترێت: پێشتریش لە مانگی شووباتی ڕابردوودا، ئەنەسی برای ئاشکرای کردبوو کە ئامادەکاریی چڕوپڕ دەکرێت بۆ گەڕانەوەی ئەساڵە بۆ دیمەشق و سازکردنی کۆنسێرتێکی گەورە، ئەمەش جۆش و پەرۆشیی ئەو هونەرمەندە بۆ ئەم هەنگاوە نیشان دەدات.