ئەمساڵ لە هەرێمی کوردستان 41 کەس خنکاون

ئاڤا نیوز

لە ماوەی هەشت مانگی ڕابردوو 41 کەس لە هەرێمی کوردستاندا خنکاون، ئاڤا میدیا ئەو پارێزگایە ئاشکرا دەکات کە زۆرترین ڕووداوی خنکانی لێ تۆمار کردووە.

وێنە گەورەکە: سەرەرای هەڵواسینی ڕێنماییەکان بۆ قەدەغەکردنی مەلەوانی لەو شوێنانەی مەترسیان لەسەرە، بەڵام بەشێکی هاونیشتمانییان پابەندی ڕێنماییەکان نابن و ناشارەزا لەو شوێنانە مەلە دەکەن کە قووڵن و ئاوی بەخوڕیان هەیە، بەمەش ژیانیان دەکەوێتە مەترسییەوە و بەشێکیان دەخنکێن.

لێدوانی فەرمی: سەرکەوت کاڕەش، بەڕێوەبەری بەشی ڕاگەیاندن لە بەڕێوەبەرایەتیی گشتیی بەرگریی شارستانی بە ئاڤای ڕاگەیاند: لە ماوەی هەشت مانگی ڕابردوو دا 41 ڕووداوی خنکان لە ناوچە جیاوازەکانی هەرێمی کوردستان تۆمار کراوە، لەو ژمارەیە زۆرترینیان لە سنووری پارێزگای هەولێر بووە کە 14 ڕووداوە.

زانیاریی زیاتر: بە گوتەی سەرکەوت کاڕەش، دهۆک بە شەش ڕووداوی خنکان لە دوای هەولێر دێت، لە سنووری سلێمانیش 2 ڕووداوی خنکان تۆمار کراون، لە هەڵەبجەش هیچ رووداوێکی خنکان نەبووە، 19 ڕووداویش لە سنووری ئیدارە سەربەخۆکان بووە.