سەرەڕای ئاگربەست، خاچی سوور هۆشداری لە دۆخی 'مەترسیداری' سوەیدا دەدات

ئاڤا نیوز

لیژنەی نێودەوڵەتی خاچی سوور هۆشداری دەدات کە سەرەڕای ئاگربەستی زیاتر لە 10 ڕۆژە لە سوەیدا، دۆخی مرۆیی "جێگەی نیگەرانییەکی قووڵە". سەرۆکی نێردەی ڕێکخراوەکە جەخت دەکاتەوە کە کەمیی پێداویستییە سەرەکییەکان و بەردەوامیی ڕفاندنی هاووڵاتییان، قەیرانەکەی قووڵتر کردووەتەوە.

وێنە گەورەکە: لە دوای ڕووخانی دەسەڵاتی ئەسەد لە چەند مانگی ڕابردووەوە، پارێزگای سوەیدا لە باشووری سووریا گرژی و ئاڵۆزیی لەنێوان چەکدارەکانی ناوخۆیی دروزەکان و گرووپەکانی سەر بە حکومەتی سووریا بەخۆیەوە بینی و بەهۆیەوە سەدان کەس کوژران و برینداربوون، ئەمە سەرەڕای خراپی دۆخیی مرۆیی و نەگەیشتنی هاوکارییەکان.

لێدوانی فەرمی: ستێفان ساکالیان، سەرۆکی نێردەی خاچی سوور، دوای سەردانێکی مەیدانی بۆ پارێزگای سوەیدا، ڕایگەیاند کە دانیشتووانی ناوچەکە بەدەست کەمیی خۆراک، ئاو و دەرمانەوە دەناڵێنن. ئاماژەی بەوەدا کە ئەو 27 بارهەڵگرە هاوکارییەی گەیشتوونەتە ناوچەکە، بە بەراورد بە قەبارەی قەیرانەکە بەس نییە و ناتوانێت کەمترین پێداویستی پڕبکاتەوە.

لەهەمان کاتدا: ساکالیان ڕایگەیاند، داواکارییەکانی خەڵک تەنیا هاوکاری نییە، بەڵکو گەڕاندنەوەی خزمەتگوزارییەکان و دابینکردنی ئاسایشیشە. ئەو هۆشداریی دا لە بەردەوامیی ڕووداوەکانی ڕفاندنی هاووڵاتییانی سڤیل و وتی: "پێویستە ئاستی متمانە لە نێوان لایەنەکاندا دروست بکرێتەوە."

زانیاریی زیاتر: خاچی سوور ئامادەیی خۆی بۆ نێوەندگیری لە دۆسیەی ڕفێندراوەکاندا دەربڕی، بەو مەرجەی بارودۆخێکی گونجاو بۆ ئەو کارە بێتە ئاراوە.