عێراق و کوردستان لیژنەیەکی هەمیشەیی بۆ یەکخستنی پێناس و باجی گومرگی پێکدەهێنن

ئاڤا نیوز

ئەنجوومەنی وەزاریی عێراق بۆ کاروباری ئابووری بە ئامادەبوونی نوێنەرانی هەرێمی کوردستان کۆبووەوە، بۆ چارەسەری کێشەکان و جێبەجێکردنی بڕیاری حکومەتی فیدراڵیش بۆ یەکخستنی پێناس و باجی گومرگی، لەکۆبوونەوەکەدا بڕیاردرا عێراق و کوردستان لیژنەیەکی هەمیشەیی تایبەت بە دەروازەکان و گومرگ پێکبهێنن.

وێنە گەورەکە: بەگوێرەی بڕیاری ژمارە 270ی حکومەتی عێراق کە ساڵی 2025 دەریکردووە، باجی هاوردەکردنی ژمارەیەک کاڵا گۆڕانکارییان بەسەردا هاتووە، بەڵام گومرگی ماددە سەرەکیی و پێویستییەکان وەک خۆیان ماونەتەوە، بەگوێرەی بڕیارەکەش لە 1ی حوزەیرانی ئەمساڵەوە کار بە نرخە تازەکان دەکرێت.

ڕاگەیێنراوی فەرمی: ئەنجوومەنی وەزاری عێراق بۆ کاروباری ئابووری ئەمڕۆ دووشەممە بەسەرۆکایەتیی فوئاد حوسێن، جێگری سەرۆکوەزیران و وەزیری دەرەوە و بە ئامادەبوونی وەزیرانی پلاندانان، دارایی، بازرگانیی، کشتووکاڵ، پیشەسازیی، کار و کاروباری کۆمەڵایەتی، ئەمینداری ئەنجوومەنی وەزیران و پارێزگاری بانکی ناوەندی کۆبووەوە، لە کۆبوونەوەکەدا سەرۆکی دەستەی دەروازە سنوورییەکان و بەڕێوەبەری گشتی دەستەی گومرگی عێراق و هەرێمی کوردستان و ڕاوێژکاری وەزارەتی ناوخۆی کوردستان ئامادەبوون.

بەگوێرەی ڕاگەیێنراوی کۆبوونەوەکە، گفتوگۆ لەسەر یەکخستنی پێناس و باجی گومرگی لە سەرجەم دەروازەکانی عێراق کراوە، بڕیاری پێکهێنانی لیژنەیەکی هەمیشەییش دراوە بەسەرۆکایەتیی ڕاوێژکاری سەرۆکوەزیرانی فیدراڵ بۆ کاروباری دەروازەکان و گومرگ و ئەندامێتی لایەنە پەیوەنیدارەکانی عێراق و هەرێمی کوردستان، ئەویش بۆ یەکخستنی هەوڵەکان و کۆبوونەوەی خولی بەمەبەستی گەشەپێدانی کاری گومرگی، لای خۆیانەوە نوێنەرانی کوردستان بڕیارە لە ماوەی 30 ڕۆژ لە پێکهێنانی لیژنەکە، سەرنج و بۆچوونی خۆیان لەبارەی بڕیاری حکومەت بۆ یەکخستنی پێناس و باجی گومرگی پێشکەش بکەن.

ئەنجوومەنی وەزاری عێراق بۆ کاروباری ئابووری دۆخی کەرتی کاری وڵات، هەوڵەکان بۆ باشترکردنی ژینگەی وەبەرهێنان و بەئەلیکترۆنیکردنی کاروبارەکانیشی تاوتوێ کرد، بڕیاریشیدا مۆڵەت بە کارگەی بەغدا بدات بۆ هەناردەکردنی قیر بۆ دەرەوە، داواشیکرد حکومەت کۆمپانیا بیانییەکان لە باجی کردنەوەی لقیان لە عێراق ببەخشێت.