کریملن:  ڕووسیا هەڵگیرسانی جەنگی ئەتۆمی ڕەتدەکاتەوە

ئاڤا نیوز

وتەبێژی کۆشکی کریملن هۆشداری دەدات لە جوڵاندنی ژێر دەریایی چەکی ئەتۆمی لەلایەن ئەمریکاوە و بە هەنگاوێکی نەرێنی ناوزەندی دەکات. دەشڵێت، ڕووسیا هەڵگیرسانی جەنگی ئەتۆمی ڕەتدەکاتەوە.

وێنە گەورەکە: فەرمانێکی دۆناڵد ترەمپ، سەرۆکی ئەمریکا بۆ جوڵاندنەوەی دوو ژێردەریایی ئەتۆمی بۆ نزیک سنوورەکانی ڕووسیا کاردانەوەی لەسەر ئاستی نێودەوڵەتی لێکەوتووەتەوە، جوڵەکەی ترەمپ وەڵامێک بوو بۆ لێدوانەکانی دیمیتری مێدڤێدیڤ، سەرۆکی پێشووی ڕووسیا کە ترەمپ بە لێدوانی زۆر ئاژاوەگێڕانە ناوی برد.

لێدوانی فەرمی: لە وەڵامی فەرمانی ژێردەریاییەکەی ترەمپدا، دمیتری پێسکۆڤ، وتەبێژی کۆشکی کریملن لە لێدوانێکی ڕۆژنامەوانیدا ڕایگەیاند: بڕیارەکەی سەرۆکی ئەمریکا هەنگاوێکی نەرێنییە، بەڵام بۆ ڕووسیا زۆر جێی نیگەرانی نین و  ژێردەریاییەکانی ئەمریکا پێشوەختە لە ئەرکدان، بەڵام دەبێت هەمووان زۆر وریابن سەبارەت بە بڕیاردان و قسەکردن سەبارەت بە هێزی ئەتۆمی، ڕووسیا نایەوێت بچێتە جەنگی ئەتۆمییەوە، چونکە هەمووان تێیدا دۆڕاو دەبن.

وتەبێژی کۆشکی کریملن گوتیشی: بڕیارەکەی ترەمپ بە پەرەسەندنی ناکۆکی و ئاڵۆزییەکانی نێوان هەردوو وڵات نابینین، دۆخی ئێستا زۆر ئاڵۆزە و گفتوگۆی بەردەوام لەسەر ڕووداو و پێشهاتەکان لەگەڵ وڵاتانی پەیوەست بە ئاسایشی جیهانەوە ئەنجام دەدەین، وەک هەمیشە ڕێگەی دیپلۆماسی بە تەنها ڕێگەچارە دەزانین.