دڵنیایی دەدرێت بەو هاووڵاتییانەی ئاوی خواردنەوەیان لەسەر بەنداوی دووکانە

ئاڤا نیوز

ئەمساڵ بەهۆی کەمبارانییەوە ئاستی ئاوی بەنداوی دووکان بەشێوەیەکی بەرچاو دابەزیوە، قایمقامی قەزاکەش دڵنیایی بەو هاووڵاتییانە دەدات کە پشتیان بە ئاوی ئەو بەنداوە و دەڵێت: تا وەرزی باران بارین مەترسی لەسەر ئاوی ناوچەکە نییە.

چیرۆکی سەرەکی: کەمبارانی ئەمساڵ کاریگەری هەبووە لەسەر کەمبوونەوەی ئاوی خوارنەوە لە زۆرینەوەی ناوچەکانی هەرێمی کوردستان و بەشێک لەو بیرانەش وشکیان کردووە کە هەر بۆ دابینکردنی ئاو پشتیان پێبەستراوە، ئێستا بەمەبەستی کامکردنەوەی ئەو کاریگەرییە چەندین ڕێکاری پێویست لە ناوچە جیاوازەکان گیراوەتە بەر. 

لێدوانی فەرمی: سیروان سەرحەد، قایمقامی قەزای دووکان لەوبارەیەوە بە ئاڤای ڕاگەیاند: هەرچەندە ئاستی ئاوی دەریاچەی دووکان بەرێژەیەکی یەکجار زۆر دابەزیوە، بەڵام تا وەرزی باران بارین دەستپێدەکات مەترسی لەسەر ئاوی ئەو ناوچانە نییە کە بۆ ئاوی خواردنەوە پشت بەدەریاچەکە دەبەستن و بۆیە بەپێی پێویست ئاو بەردەدەنەوە.

پێشووتر لەڕێگەی زێی بچووکەوە تەنیا 5 پێنج مەتر سێجا ئاو دەڕژایە دەریاچەکەوە، بەڵام  بەهۆی بەردانەوەی ئاوی زێیەکەوە لەلایەن ئێرانەوە ئێستا بەرزبووەتەوە بۆ نزیکەی 40 مەتر سێجا ئاو و ئەمەش تاڕادەیەک باشە بۆ دەریاچەکە.

لەلایەکی دیکەوە: ئێستا ڕۆژانە  تەنیا 55 مەتر سێجا ئاو  بۆ سلێمانی و پیرەمەگروون و چەمچەماڵ بۆئاوی خواردنەوە بەکار دەهێندرێت.