گه‌نجێكی ڕۆژئاوای کوردستان له‌ نێوان هه‌ولێر و مووسڵدا گیری خواردووه‌

ئاڤا نیوز

گه‌نجێكی ڕۆژئاوای کوردستان له‌ نێوان هه‌ولێر و مووسڵدا گیری خواردووه‌ و ڕێگەی چوون و گەڕانەوەی پێ نادرێت.

چیرۆکی سەرەکی: محەممەد عەلی تەمەن 26 ساڵ کە خەڵکی کۆبانییە لە ڕۆژئاوای کوردستان، دوای نۆ ساڵ لە دووری کەسوکاری، لەم دواییانە ویستوویەتی بگەڕێتەوە ناو کەسوکارەکەی، چونکە باوکی نەخۆشە و داوای کردووە زوو بگەڕێتەوە، ئەویش لەگەڵ سوفێرێکی تاکسی ڕێکدەکەوێ ، بۆئەوەی بیگەیێنێتە سنووری فیشخابوور لە سنووری زاخۆ، بەڵام شوفێرەکە فێڵی لێکردووە و لە ناوچەیەکی نێوان هەولێر و مووسڵ دایناوە و ڕۆیشتووە. ئێستا گیری خواردووە و هیچکامیان ڕێگەی پێنادەن لە سنووری ئەو دوو پارێزگایە بپەڕێتەوە.

زانیاریی پەیامنێر: محەممەد عەلی، قسەی بۆ ئاڤا کردووە و وتوویەتی: ماوەی ساڵێکە لە هەولێر دەژیم، هەواڵیان پێدام کە باوکم لە کۆبانێ نەخۆشە و دەبێ زوو بێیتەوە، منیش لە خۆشی شادبوونەوە بە باوکم، خۆم ئامادە کرد کە نۆ ساڵە لە کۆبانێ و کەسوکارەکەم دوورم، لەگەڵ شوفێرێکی تەکسی ڕێککەوتم بە 200 دۆلار بمبات بۆ سنووری فیشخابوور بۆ ئەوەی لەوێوە بگەڕێمەوە ڕۆژاوای کوردستان، بەڵام شوفێری تەکسییەکە فێڵی لێکردووم و لە شوێنێک لەنێوان هەولێر و مووسڵ منی دانا و ڕۆیشت.

دەشڵێت، "ئەوە هەشت ڕۆژە ئەم گەنجە لەو شوێنەدا گیرم خواردووە، نە دەهێڵن، بگەڕێمەوە ناو هەولێر، نە بۆ مووسڵیش ڕێگەم پێ دەدەن داخل ببم".

ئەو گەنجەی ڕۆژئاوای کوردستان داوا دەدکات ڕێگەی پێ بدەن هەتا سەر سنووری ڕۆژئاوای کوردستان بڕوات، ئیتر جارێکی تر ناگەڕێتەوە.