عێراق وەک دەوڵەتێکی جیا مامەڵە لەگەڵ کاڵا و شتومەکەکانی کوردستان دەکات

ئاڤا نیوز

ئەندامێکی شاندی دانوستانی نێوان هەولێر و بەغدا ڕایگەیاند، چەند ڕۆژێک دوای ڕێککەوتنی نێوان هەولێر و بەغدا، دووبارە ڕێگە لە هەناردەکردنی کاڵا و شتومەکی کوردستان بۆ پارێزگاکانی عێراق دەگیرێت.

وێنە گەورەکە: لە ڕۆژی 06-05-2025، شاندی ژوورە بازرگانییەکانی هەرێمی کوردستان و یەکێتیی ژوورە بازرگانییەکانی عێراق لەسەر کۆمەڵێک خاڵ ڕێککەوتن، بۆ ئەوەی دووبارە دەست بە هەناردەی کاڵا لە هەرێمی کوردستانەوە بۆ پارێزگاکانی عێراق بکرێتەوە، بەڵام تاوەکو ئێستا ڕێگە لە هەناردەکردنی کاڵا و شتومەکەکان دەگیرێت.

لێدوانی فەرمی: د. سامی جەلال، ئەندامی شاندی دانوستانی هەرێمی کوردستان لەگەڵ بەغدا بە ئاڤای ڕاگەیاند: چەند ڕۆژێکی کەم دوای ڕێککەوتنەکە، دووبارە ڕێگە لە هەناردەکردنی ئەو کاڵا و شتومەکانە گیراوە، بە دوو تا چوار ڕۆژ بارهەڵگرەکان ڕادەگیرێن و دەستبەسەر بارهەڵگرەکاندا دەگرن، تاوەکو پارەی دەرچوون نەدەن، ڕێگەیان پێنادرێت لە بازگەکانەوە بڕۆن، کاتێک ئەو هەنگاوەشیان قەرەباڵغییەکی زۆری دروست کرد، بە بڕیاری تاکلایەنە نووسینگەی گومرگیان لە خاڵەکانی پشکنین داناوە، وەک دەوڵەتێکی دیکە مامەڵە لەگەڵ کوردستان دەکەن.

ئەو نووسینگانەی عێراق کردوویەتییەوە، یەکێکیان بۆ ڕێگەی نێوان دهۆک – مووسڵ بەکاردێت، چیمەن لە نێوان کەرکووک و سلێمانی کراوەتەوە، "دارەمان"ـیش کەوتووەتە نێوان هەولێر و کەرکووک.

خاڵە نەرێنییەکان: بەشێکی ئەو بارهەڵگرانەی ڕاگیراون، سەوزە و میوە و خواردنەکانی دیکەیان بردووە کە نابێت ڕێگەیان لێ بگیرێت و بەزوویی تێکدەچن، وەستانی ئەو بارهەڵگرانەش وا دەکات کاڵا و شتومەکان نەگەنە خوارووی عێراق، ئەمەش دەبێتە هۆی بەرزبوونەوەی نرخەکانیان لە بازاڕ دا.