ناچارکردنی مەسیحییەکان بەخۆ تۆمارکردن بە عەرەب کاردانەوەی تووندی لێدەکەوەتەوە

ئاڤا نیوز

دوو پەرلەمانتاری کوردستان لە پێکهاتەی کریستیان ڕەخنەی تووند لە بزووتنەوەی بابلیۆن و وەزارەتی ناوخۆی عێراق دەگرن، سەبارەت بە فۆرمێکی دامەزراندن لە کۆلێژی پۆلیس کە مەسیحییەکان ناچار دەکات لە خانەی نەتەوەدا 'عەرەب' هەڵبژێرن. ئەوان ئەم کارە بە "پێشێلکارییەکی ئاشکرای دەستوور" و "هەوڵێک بۆ سڕینەوەی ناسنامەی گەلی کلدان، سریان، ئاشووری و ئەرمەن" ناودەبەن.

ڕاگەیێنراوی فەرمی: هەریەک لە جەیمس حەسدۆ هیدۆ و ڕامی نوری سیاوش، ئەندامانی پەرلەمانی کوردستان لە پێکهاتەی کریستیانەکان لە ڕاگەیێنراوێکدا کە وێنەیەکی بە تایبەت بۆ ئاڤا میدیا نێردراوە، پەیامێکیان ئاراستەی سەرۆکوەزیرانی عێراق، وەزیری ناوخۆ، بەڕێوەبەری گشتی پۆلیس و ڕای گشتی عێراقیان کردووە و و تێیدا داوای ڕاگرتنی ئەم پێشێلکارییانە دەکەن و دووپاتی دەکەنەوە کە "نە دوژمن و نە بەکرێگیراو ناتوانن ئەم ڕاستییە بسڕنەوە." هاوکات ڕەخنەی تووندیش لە بزووتنەوەی بابلیۆن دەگرن.

ئەوەی پێویستە بیزانیت: ئەو فۆرمەی بۆ دامەزراندن لە کۆلیژی پۆلیس دانراوە، لە بنەڕەتدا هیچ بژاردەیەکی بۆ ناسنامەی گەلانی کلدانی، سریانی، ئاشووری و ئەرمەنی تێدا نییە و تەنیا سێ بژاردەی "عەرەب، کورد، تورکمان"ی تێدایە، بە گوتەی ئەو دوو پەرلەمانتارە ئەمە پێشێلکردنی ماددەکانی (3) و (125)ی دەستووری عێراقە.

هۆكارە زانراوەكان: کێشەکە دوای ئەوە سەریهەڵدا کە نووسینگەی لقی قەرەقۆشی بزووتنەوەی بابلیۆن لە ڕاگەیێنراوێکدا داوای لە گەنجانی مەسیحی کردووە داواکاری پێشکەش بکەن بۆ پەیمانگای باڵای پەرەپێدانی ئەمنی و ئیداری، بەڵام داوایان لێدەکات لە کاتی پڕکردنەوەی فۆرمی ئەلیکترۆنیدا لە خانەی "نەتەوە" (القومية)، بژاردەی "عەرەب" هەڵبژێرن.

کاریگەریی و لێکەوتەکان: ئەو دوو پەرلەمانتارە، بزووتنەوەی بابلیۆن سەرکردەکەی، ڕەیان کلدانی، تۆمەتبار دەکەن بەوەی کە بوونەتە "ئامرازێکی هەرزان" بۆ "تواندنەوە و سڕینەوەی ئەم گەلە ڕەسەنە." دەڵێن: ئەمە یەکەمجار نییە و هەوڵەکانی ئەم بزووتنەوەیە بۆ "بەعەرەبکردنی گەلەکەمان، پەراوێزخستنی زمانەکەمان، هێرشکردنە سەر کەنیسە و ترساندنی دانیشتووانی دەشتی نەینەوا" بەردەوام بووە.

لەهەمان کاتدا: جەختیان لەوە کردووەتەوە، "جینۆساید لە دژی گەلەکەمان بە شێوازی جیاواز بەردەوامە و چەکی توانەوەی نەتەوەیی و سڕینەوەی ناسنامە، کوشندەترە لە فیشەکی ستەمکاران."