دادگای فیدڕاڵی شەش سکاڵای دیکە ڕەت دەکاتەوە

ئاڤا نیوز

ئەمڕۆ و دوێنێ دادگای فیدڕاڵی دوو دانیشتنی ئەنجامدا و شەش سکاڵای بینیی، بەهۆکاری نەبوونی تایبەتمەندیشەوە کۆی سکاڵاکانی ڕەتکردەوە.

وێنە گەورەکە: لە 8ی مانگی تەمموزەوە کە دادوەر مونزر ئیبراهیم حوسێن، وەک سەرۆکی نوێی دادگای باڵای فیدراڵیی دەستبەکاربووە، دادگاکە 10 دانیشتنی ئەنجامداوە و 30 سکاڵای تاوتوێ کردووە، ئەوەی جیاوازە لەکۆی سکاڵاکان هیچ بڕیارێکی لە بەرژەوەندی سکاڵاکارەکان دەرنەکردووە.

ڕاگەیێنراوی فەرمی: دادگای فیدراڵی ئەمڕۆ و دوێنێ شەش سکاڵای لەبارەی دەستبەکاربوونی ئەندامانی ئەنجوومەنی خزمەت، بودجەی دەستەی شەهیدان، بەڕێوەبردنی پۆستەکان بە وەکالەت و یاسای هەڵبژاردنی پەرلەمان و ئەنجوومەنی پارێزگاکان تاوتوێ کردووە و بەهۆی نەبوونی تایبەتمەندی یان بوونی بڕیاری پێشتری دادگاکە لەسەر ئەو بابەتانە، سکاڵاکانی ڕەتکردووەتەوە.

لەلایەکی دیکەوە: سەرۆکی نوێی دادگای باڵای فیدراڵیی 3ی تەممووز و دوای سوێندخواردنی لەبەردەم سەرۆککۆمار، وتی، پابەندە بە سەربەخۆیی و دەشبێت دادگای فیدراڵی لەهەر دەستوەردانێک بە دوور بێت.

باکگراوند: پێشتریش ئەندامێکی دادگای فیدراڵی بە ئاڤا میدیای ڕاگەیاندبوو، لەمەودوا دادگاکەیان شێوازی کارکردنی خۆیی و بڕیاردانی لەسەر سکاڵاکان دەگۆڕێت و ئاراستەیەکی نوێی کارکردنی دەبێت، بە دەگمەن نەبێ فەرمان سالاریش دەرناکات.