نەتەوەیەکگرتووەکان پێشنیازی سڕینەوەی ناوی عێراق لە لیستی پێشێلکارییەکانی دژی منداڵان دەکات

ئاڤا نیوز

سەرۆکوەزیرانی عێراق، ستایشی هەوڵەکانی دامەزراوە حکومییەکانی کرد کە بوونە هۆی ئەوەی سکرتێری گشتیی نەتەوەیەکگرتووەکان پێشنیاز بکات ناوی عێراق لە ڕاپۆرتی داهاتووی تایبەت بە پاراستنی منداڵان بسڕێتەوە.

 

بۆچی گرنگە: سڕینەوەی ناوی عێراق لەم ڕاپۆرتە نێودەوڵەتییە، وەک هەنگاوێکی ئەرێنی بۆ باشترکردنی وێنەی وڵاتەکە لەسەر ئاستی جیهانی و جەختکردنەوە لەسەر پابەندبوونی بە پاراستنی مافەکانی مرۆڤ، بەتایبەتیش مافەکانی منداڵان، هەژمار دەکرێت.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، سوودانی، ئاماژەی بەوەداوە کە ئەم دەستکەوتە دەبێت ببێتە پاڵنەرێکی بەهێزتر بۆ بەردەوامبوونی کارەکانی دەزگا پەیوەندیدارەکان لە بواری چاودێریکردنی منداڵان و چارەسەرکردنی هەر پێشێلکارییەکی پێشوو. جەختیشی لەسەر گرنگیی دامەزراندنی ژینگەیەکی تەندروست بۆ منداڵان کردەوە، کە گەشەیەکی دروست و پاراستنی یاساییان بۆ مسۆگەر بکات.

 

لەهەمان کاتدا: سەرۆکوەزیران بەتایبەتی ستایشی هەوڵە دڵسۆزانەکانی وەزارەتەکانی "کار و کاروباری کۆمەڵایەتی" و "دەرەوە"ی کرد، کە ڕۆڵێکی سەرەکییان بینیوە لە پاراستنی مافەکانی منداڵان و ناساندنی هەنگاوەکانی عێراق لەسەر ئاستی نێودەوڵەتی.