لەسەر دانیشتنی پەرلەمان کێشە دەکەوێتە نێوان سەرۆکی پەرلەمانی عێراق و جێگری یەکەمی

ئاڤا نیوز

لەسەر یاساییبوونی دوایین دانیشتنی پەرلەمان، کێشە دەکەوێتە نێوان سەرۆکی پەرلەمان و جێگری یەکەمی و هەردوولا یەکتر تۆمەتبار دەکەن، سەرۆکی پەرلەمان لۆمەی جێگرەکەی دەکات و جێگرەکەشی، بە تووندی بەرپەرچی دەداتەوەو پێی دەڵێت: "مافی هەڵوەشاندنەوەی بڕیارەکانی پەرلەمانت نییە".

 

چیرۆکی سەرەکی: لە دانیشتنی ڕۆژی سێشەممەی پەرلەمانی عێراق بەهۆی زیادکردنی بڕگەی دەنگدان لەسەر سەرۆکی ئەنجوومەنی دەوڵەت و ئەندامانی ئەنجوومەنی خزمەت لەلایەن شیعەکانەوە، دانیشتنەکە گرژی تێکەوت و دوو پەرلەمانتاری شیعە و سوننە کردیان بە شەڕی دەستەویەخە، بەهۆی شکانی نیسابی دانیشتنیش دانیشتنەکە و بڕگە پەسەندکراوەکانی "هەڵوەشێنرایەوە". لای خۆیەوە، فەرمانگەی ڕاگەیاندنی پەرلەمانی عێراق هەڵوەشانەوەی دانیشتنەکەی ڕاگەیاند بەهۆی نەبوونی نیسابی یاساییەوە.

 

نووسراوی فەرمی: دواتر مەحموود مەشهەدانی، سەرۆکی ئەنجوومەنی نوێنەرانی عێراق لە نووسراوێکدا کە ئاراستەی جێگرەکانی و سەرجەم ئەندامان و فراکسیۆنەکانی پەرلەمانی کردووە، بە پشتبەستن بە ماددەی (34/دووەم) لە پەیڕەوی ناوخۆی پەرلەمان، جەختی کردووەتەوە کە بەڕێوەچوونی دانیشتنەکە "پێشێلکارییەکی ڕوونی پەیڕەوی ناوخۆی پەرلەمانە و هەر بڕیار و ڕێکارێک لەو دانیشتنەدا دەرچووبێت، بە پووچەڵ (باطل) دادەنرێت و هیچ لێکەوتەیەکی یاسایی نابێت."

 

بۆچوونی لایەنی بەرامبەر: نووسینگەی موحسین مەندەلاوی، جێگری یەکەمی سەرۆکی پەرلەمان، بە تووندی بەرپەرچی بانگەشەکانی مەشهەدانی دەداتەوە و ڕایدەگەیێنێت دانیشتنەکە "بە تەواوی یاسایی و شەرعی" بووە.

 

نووسینگەی مەندەلاوی چەندین ماددەی یاسایی وەک بەڵگە هێناوەتەوە، لەوانە ماددەی (25/یەکەم) کە بە ڕوونی دەسەڵات دەداتە جێگری یەکەم بۆ بەڕێوەبردنی دانیشتنەکان "لە کاتی ئامادەنەبوونی سەرۆک یان نەتوانینی لە جێبەجێکردنی ئەرکەکانیدا." 

 

هەروەها دووپاتیکردووەتەوە کە دانیشتنەکە نیسابی یاسایی (ژمارەی پێویستی ئامادەبووان)ی هەبووە و هەموو بڕیارەکانی بەپێی یاسا دەرچوون.

 

لەلایەکی دیکە: نووسینگەی جێگری یەکەمی سەرۆکی پەرلەمان ئاماژەی بەوەش کردووە کە بڕیارەکانی پەرلەمان تەنیا لەلایەن دادگای فیدراڵییەوە هەڵدەوەشێنرێنەوە، نەک بە نووسراوێکی سەرۆکایەتی.