شایستە داراییەکانی فیرقە نوێیەكانی وەزارەتی پێشمەرگە خەرج دەكرێت

ئاڤا نیوز

وەزیری دارایی و ئابووریی هەرێمی كوردستان، هەردوو بەڕێوەبەرایەتیی گشتیی بودجە و ژمێركاری ڕاسپاردووە، بەپێی دۆخی دارایی و بە چەند قۆناغێك، شایستە داراییەكانی فیرقە نوێیەكانی وەزارەتی پێشمەرگە خەرج بكەن.

 

وێنە گەورەكە: ڕۆژی 5ـی ئابی 2025، شاندی هاوبەشی وەزارەتی پێشمەرگە و كۆنسوڵخانەی ئەمریكا لە هەولێر، بە فەرمی داوایان لە وەزیری دارایی و ئابووریی هەرێمی كوردستان كرد، شایستەكانی فیرقە نوێیەكانی وەزارەتی پێشمەرگە خەرج بكات، ‌لای خۆیه‌وه‌، وەزیری دارایی، بەڵێنی جێبەجێکردنی داواکارییەکانی دا.

 

زانیاریی بەدەستهاتوو: ئاوات شێخ جەناب، وەزیری دارایی و ئابووریی هەرێمی کوردستان، دوای بەڵێنی جێبەجێكردنی داواكارییەكانی شاندی هاوبەشی ئەمریكا و وەزارەتی پێشمەرگە، بەڕێوەبەرایەتییە گشتییەکانی بودجە و ژمێركاری ڕاسپاردووە، بەپێی بارودۆخ و بە چەند قۆناغێک شایستە داراییەكانی فیرقە نوێیەكان خەرج بكەن.

 

لەلایەكی دیكەوە: وەزیری دارایی و ئابووریی هەرێمی كوردستان ڕایگەیاند، سه‌رجه‌م هێزه‌كانی پێشمه‌رگه‌ خاوه‌نی (UPN)ـی تایبه‌ت به‌ خۆیانن و زیاتر له‌ 80 هه‌زاركه‌س مووچه‌كانیان به‌ شێوه‌ی ئه‌لیكترۆنی وه‌رده‌گرن كه‌ ده‌كاته‌ نزیكه‌ی 90%ـی هێزه‌كانی سه‌ربه‌ وه‌زاره‌تی پێشمه‌رگه‌.

 

ئەوەی پێویستە بیزانیت: لە چوارچێوەی پرۆسەی چاكسازی و ڕێكخستنەوەی هێزی پێشمەرگەی كوردستان، هەوڵەكان بۆ ڕێكخستنەوەی كارەكانی فەرماندەیی دەڤەرەكان، بەهەماهەنگیی هێزەكانی هاوپەیمانیی نێودەوڵەتی بەردەوامی هەیە، بە ئامانجی ڕێكخستنەوەی سەرجەم فیرقەكانی پیادە و یەکخستنەوەی سەرجەم هێزەکان لەژێر چەتری وەزارەتی پێشمەرگەدا.