حەنان فەتلاوی چارەسەرێکی "ڕیشەیی" بۆ کێشەکانی نێوان هەولێر و بەغدا پێشنیاز دەکات

ئاڤا نیوز

حەنان فەتلاوی، ئەندامی ئەنجوومەنی نوێنەرانی عێراق و سەرۆکی حیزبی "ئیرادە"، چارەسەرێکی نوێ و "ڕیشەیی" بۆ کۆتاییهێنان بە کێشە بەردەوامەکانی نێوان حکومەتی فیدراڵی و حکومەتی هەرێمی کوردستان دەخاتەڕوو. پێیوایە کێشەکە پەیوەندی بە سەرۆکوەزیرانەکانەوە نییە، بەڵکو پەیوەستە بە خودی سیستەمەکەوە و پێشنیازی جیاکردنەوەی تەواوەتیی دارایی دەکات.

وێنە گەورەکە: جیا لە کێشە هەڵپەسێردراوەکان لە نێوان هەردوو حکومەتی هەرێمی کوردستان و حکومەتی فیدراڵ،  لەدوای ساڵی 2014ـەوە کێشە داراییەکان بەردەوام بووە و تاوەکو ئێستاش چارەسەرێکی ڕیشەیی بۆ نەدۆزراونەتەوە.

لێدوانی فەرمی: حەنان فەتلاوی، ئەندامی ئەنجوومەنی نوێنەرانی عێراق لە لێدوانێکی تەلەفزیۆنیدا ڕایگەیاند: "کێشەی کورد نە سوودانی، نە مالیکی، نە عادل عەبدولمەهدی، نە کازمی و نە عەبادی ناتوانن چارەسەری بکەن. تەنانەت ئەگەر هەر کەسێکی دیکەش ببێتە سەرۆکوەزیران، ناتوانێت ئەم کێشەیە چارەسەر بکات، چونکە کێشەکە هەرگیز چارەسەر نابێت."

لەهەمان کاتدا: فەتلاوی پێشنیازی چارەسەرێکی ڕیشەیی کرد و وتی: "بە بڕوای من، چارەسەر ئەوەیە کە ئازا بین و ڕێککەوتنێکی ڕوون و ڕاشکاوانەیان لەگەڵ بکەین. براینە، ئێوە عێراقین و ئێمە دەتانپارێزین و هاوبەشن لە هەموو دامەزراوە فیدراڵییەکان، بەڵام پارەی ئێوە بۆ خۆتان و پارەی ئێمەش بۆ خۆمان. نەوتی ئێوە بۆ خۆتان و نەوتی ئێمەش بۆ خۆمان."

زانیاریی زیاتر: فەتلاوی گوتیشی: "نەوتەکەتان ببەن، مووچە و پڕۆژەکانتان لەسەر خۆتان بێت، ئێمەش وەک 15 پارێزگاکەی دیکە، نەوت و داهات و باج و ڕسوماتمان بۆ خۆمان بەکاردەهێنین."