دانوستانەکانی هەناردەکردنەوەی نەوت لە ڕێگەی جەیهانەوە گەیشتوونەتە قۆناغی کۆتایی

ئاڤا نیوز

دانوستانەکان بۆ دەستپێکردنەوەی هەناردەکردنی نەوت لە ڕێگەی بەندەری جەیهانی تورکیاوە گەیشتوونەتە "قۆناغێکی زۆر پێشکەوتوو"، و تەنیا چەند وردەکارییەکی بچووک ماوە بۆ گەیشتن بە ڕێککەوتنی کۆتایی.

ئەوەی پێویستە بیزانیت: حەییان عەبدولغەنی، وەزیری نەوتی عێراق ڕایگەیاند، لەگەڵ هەرێمی کوردستان لەسەر پرسی هەناردەکردنەوەی نەوت و بڕی بەکارخستنی ناوخۆیی ڕێککەوتوون و لە یەک دوو ڕۆژی داهاتوودا دەست بە هەناردەکردنەوەی نەوت دەکرێتەوە.

زانیاریی بەدەستهاتوو: سەرچاوەیەکی ئاگادار لە وەزارەتی نەوتی عێراق بە ڕۆژنامەی "الصباح"ـی عێراقی ڕایگەیاند، وەزارەتی نەوت بەرەو "ڕێککەوتنێکی ئەرێنی" هەنگاو دەنێت و لە ماوەیەکی نزیکدا تێگەیشتنە تەکنیکی و لۆجستییەکان تەواو دەکرێن.

زانیاریی زیاتر: هەرچەندە تا ئێستا دەستپێکردنەوەی هەناردەکردنەکە بە شێوەیەکی فەرمی ڕانەگەیەنراوە، بەڵام سەرچاوەکە جەختی لەوە کردووەتەوە کە گفتوگۆکان زۆر نزیکن لە ئەنجام.

لەلایەکی دیکەوە: سەرچاوەکە ئاماژەی بەوەشکردووە کە کۆمپانیای بەبازاڕکردنی نەوتی عێراق (سۆمۆ) لە ڕووی تەکنیکی و لۆجستییەوە بەتەواوی ئامادەیە بۆ دەستپێکردنەوەی هەناردەکردنەکە هەرکاتێک ڕێککەوتن بکرێت. لەمبارەیەوە وەزیری نەوتی عێراقیش پشتڕاستی کردووەتەوە کە "کارەکان بەرەو ئاراستەیەکی ئەرێنی دەڕۆن."

باکگراوند: لە 2023-03-25 بە بڕیاری دادگای ناوبژیوانی پاریس هەناردەکردنی نەوتی هەرێمی کوردستان ڕاگیرا، سەرەڕای پابەندییەکانی حکومەتی هەرێمی کوردستان بە ڕێککەوتنەکان لەگەڵ حکومەتی عێراق بۆ هەناردەکردنەوەی نەوتەکە، بەڵام تاوەکو ئێستا ئەو کێشەیە چارەسەر نەبووە.