شاماران: بەرهەمهێنان لە کێڵگەکانی ئەتروش و سەرسەنگ دەستیانپێکردەوە

ئاڤا نیوز

کۆمپانیای شاماران پترۆلیۆم ڕایدەگەیێنێت، کە بەرهەمهێنانی نەوت لە هەردوو کێڵگەی ئەتروش و سەرسەنگ لە هەرێمی کوردستان دەستیانپێکردووەتەوە.

ئەوەی پێویستە بیزانیت: دەستپێکردنەوەی بەرهەمهێنانەکە لە کاتێکدایە، کارەکان لە 15ـی تەمموزی 2025 بەهۆی هێرشێکی گوماناوی درۆنییەوە بۆ سەر یەکێک لە دامەزراوەکانی کێڵگەی سەرسەنگ وەک ڕێکارێکی خۆپارێزی ڕاگیرابوون.

ڕاگەیێنراوی فەرمی: بەگوێرەی ڕاگەیەندراوێکی کۆمپانیاکە، کێڵگەی ئەتروش هیچ زیانێکی بەرنەکەوتووە و بەرهەمهێنان تێیدا بە تەواوی توانای خۆی دەستیپێکردووەتەوە، بەڵام کێڵگەی سەرسەنگ، کە لەلایەن کۆمپانیای HKN Energyـەوە بەڕێوەدەبرێت، بەهۆی ئەو زیانانەی بەر سێ کۆگای نەوت و بۆرییە پەیوەستەکان کەوتووە، بەرهەمهێنانی بە ڕێژەیەکی کەمکراوە دەستپێکردووەتەوە.

لەهەمان کاتدا: کۆمپانیای شاماران پێشبینی دەکات نزیکەی نیوەی توانای بەرهەمهێنانی کێڵگەی سەرسەنگ تا کۆتایی مانگی تشرینی یەکەمی 2025 لەکارکەوتوو بێت تا ئەو کاتەی کارەکانی چاککردنەوە تەواو دەبن.

باکگراوند: لە ناوەڕاستی مانگی تەمموزی ئەمساڵ ژمارەیەک هێرشی درۆنی كرانە سەر ژێرخانی وزەی هەرێمی کوردستان، بەهۆیەوە کارکردن لە پێنج کێڵگەی نەوتی وەستا، ئەوانەی دیکەش بەهۆکاری ئەمنی کارکردنیان سنووردار کرد.