لە حەوت ڕۆژی ڕابردوو زیاتر لە 100 هەزار کەس سەردانی فێستیڤاڵی شێفەکانیان کردووە

ئاڤا نیوز

فێستیڤاڵی شێفەکان بە سپۆنسەری ئاڤا لە سلێمانی بەردەوامە و لە حەوت ڕۆژی ڕابردوو زیاتر لە 100 هەزار کەس سەردانیان کردووە.

چیرۆکی سەرەکی: فێستیڤاڵی شێفەکان، بە سپۆنسەری سەرەکیی ئاڤا میدیا و بە بەشداری 65 شێفی ناوخۆ و بیانی بەردەوامە، فێستیڤاڵەکە 100 کۆشکی لەخۆگرتووە و لە پارکی هەواری شار لە سلێمانی بەڕێوەدەچێت.

لێدوانی فەرمی: ئارام ئەحمەد، سەرپەرشتیاری فێستیڤاڵی شێفەکان بە ئاڤای گوت: پێشوازی خەڵک لە فێستیڤاڵەکە و سەردانی کردنیان چاوەڕواننەکراو بوو، لەگەڵ بەردەوام بوونی فێستیڤاڵەکە ڕۆژانە ژمارەی سەردانیکارانی زیاتر دەبێت.

زانیاریی زیاتر: لە فێستیڤاڵەکە 65 شێفی ناوخۆ و بیانی بەشدارییان کردووە، ڕۆژانە چەندین خواردنی کوردەواری و رۆژئاوایی ئامادە دەکرێن.

لەلایەکی دیکەوە: شنیار سۆران، ئەندامی تیمی بە بازاڕکردنی فێستیڤاڵی شێفەکان بە ئاڤای گوت: لە حەوت ڕۆژدا زیاتر لە 100 هەزار کەس سەردانی فێستیڤاڵەکەیان کردووە، تەنیا لە دوو ڕۆژی ڕابردوو 34 هەزار و 600 کەس هاتوون بۆ فێستیڤاڵەکە.

ئەوەی پێویستە بیزانیت: ئاڤا میدیا سپۆنسەری سەرەکی فێستیڤاڵەکەیە و لە ڕێگەی شاشەی کەناڵی ئاڤا میدیا و وێبسایت و پلاتفۆرمەکانی سۆشیاڵ میدیا، ڕووماڵێکی تایبەتی کار و چالاکی و بەشەکانی فێستیڤاڵەکە دەکات.

گۆشەیەکی دیکەی دیمەنەکە: جگە لە ئامادەکردنی خواردن، فێستیڤاڵەکە چەندین چالاکی دیکەی نمایشی جلی کوردی، چالاکی بۆ منداڵان، و میوزیک و گۆرانی لەخۆگرتووە و چەندین هونەرمەندی دیار بەشدارییان تێدا کردووە.

هەنگاوی داهاتوو: کارەکانی فێستیڤاڵی شێفەکان ئەمڕۆ و سبەی بەردەوام دەبێت، هەریەک لە هونەرمەندان سەنگەر کەمال و جاسم چوچانی بە چەندین گۆرانی بەشداری فێستیڤاڵەکە دەکەن.