پۆلیسی سلێمانی هەڵمەتێک بۆ دەستگیرکردنی سواڵکەران دەستپێدەکات

ئاڤا نیوز

پۆلیسی سلێمانی ژمارەیەک سواڵکەری لەسەر ڕێگای عەرەبەت بۆ سلێمانی دەستگیرکرد. بەوتەی پۆلیسی سلێمانی ئەو سواڵکەرانە خەڵک و شۆفێرانیان بێزار دەکرد.

وێنە گەورەکە: دیاردەی سواڵکردن لە بەشێکی زۆری وڵاتانی جیهان بەربڵاوە، تێبینی کراوە بەشی زۆری ئەوانەی لە هەرێمی کوردستان سواڵ دەکەن، خەڵکی دەرەوەی شارەکانی هەرێمی کوردستانن. یان وڵاتانی ترن.

لێدوانی فەرمی: نەقیب سەرکەوت ئەحمەد، وتەبێژی پۆلیسی سلێمانی بە ئاڤا میدیای وت، ماوەیەک بوو ژمارەیەک سواڵکەر لەسەر ڕێگای عەربەت - سلێمانی بێزارییەکی زۆریان بۆ خەڵک و شۆفێران دروست دەکرد، ئەمڕۆ توانرا حەوت سواڵکەر دەستگیربکرێن، بەشێکیان لە شارەکانی دیکەی عێراقەوە هاتوون، بەشێکی دیکەشیان خەڵکی سووریان.

بە وتەی نەقیب سەرکەوت، هەر سواڵکەرێک لە وڵاتێکی دیکەوە هاتبێ، دەنێردرێتەوە ئەو وڵاتەی لێیەوە هاتووە. ئەو سواڵکەرانە جگە لە سواڵ، فاڵیان بۆ خەڵک دەگرتەوە. بەشێکیان پێشینەی دەستگیرکردنیان هەیە لەسەر سواڵکردن.

ئەوەی پێویستە بیزانیت: لە سەرەتای ئەمساڵەوە تا ئەمرۆ ژمارەی ئەو سواڵکەرانەی لەلایەن پۆلیسی سلێمانییەوە دەستگیرکراون گەیشتووەتە 100 سواڵکەر.