شاندی کوردستان گەڕایەوە هەولێر

ئاڤا نیوز

 

ئەو شاندەی هەرێمی کوردستان کە دوو ڕۆژ بوو لە بەغدا بوو، دوای چەندین کۆبوونەوە لەگەڵ وەزارەتی دارایی عێراق و دیوانی چاودێری دارایی و لایەنە پەیوەندیدارەکانی دیکە، ئێوارەی ئەمڕۆ گەڕانەوە هەولێر.

چیرۆکی سەرەکی: گفتوگۆکانی شاندەکە لەگەڵ حکومەتی عێراق لەسەر چەند تەوەرێکی سەرەکی بوون، کە بریتین لە داهاتی ناوخۆ، بودجە، و پڕۆژەی بەبانکیکردنی مووچە (هەژماری من)، کە لەگەڵ پرسی نەوتدا، کە خاڵی مشتومڕی نێوان هەولێر و بەغدان.

زانیاریی ئاڤا: بەگوێرەی زانیارییەکانی ئاڤا، شاندی هەرێمی کوردستان ئامادەیی خۆی نیشانداوە بۆ مانگی شەش بڕی 120 ملیار دینار لە داهاتی ناوخۆ ڕادەستی بەغدا بکات، بەڵام داوای کردووە ئەو بڕە بۆ مانگی داهاتوو (مانگی حەوت) کەمبکرێتەوە. هەروەها، گفتوگۆ لەبارەی دیاریکردنی ئەو داهاتانەوە کراوە کە پێویستە نیوەی بنێردرێت بۆ بەغدا.

سەرەڕای کۆبوونەوەکان کە لە بەیانی چوارشەممەوە تا نیوەڕۆی ئەمڕۆ پێنجشەممە بەردەوام بوون، بەرپرسێکی وەزارەتی دارایی هەرێمی کوردستان ئەوەی بۆ ئاڤا ئاشکرا کرد، هەردوولا بۆچوونی جیاوازیان هەیە. بڕیارە ڕاپۆرتێکی هاوبەش کە پێشنیاز و تێبینییەکانی هەردوولای تێدایە، ئامادەبکرێت و بۆ کۆبوونەوەی داهاتووی ئەنجوومەنی وەزیرانی عێراق لە ڕۆژی یەکشەممە بەرزبکرێتەوە.

هەنگاوی داهاتوو: محەممەد شیاع سوودانی، سەرۆکوەزیرانی عێراق، چاوەڕێی ئەو ڕاپۆرتەیە و لەسەر بنەمای ناوەڕۆکەکەی، بڕیاری کۆتایی لەبارەی خەرجکردنی مووچەی مانگی شەشی فەرمانبەرانی هەرێمی کوردستان دەدات.

ئەمەش بزانە: جێی باسە، شاندی هەرێم بەهۆی نەبوونی فڕۆکە، ناچاربوون بە ئۆتۆمبێل بگەڕێنەوە هەولێر.