ئاسایشی هەولێر دەستی بەسەر 100 ئامێری گزییکردندا گرت

ئاڤا نیوز

 

بەڕێوەبەرایەتیی ئاسایشی هەولێر ئەمڕۆ پێنجشەممە، 7ی ئابی 2025، ڕایگەیاند، هێزەکانیان توانیویانە دەست بەسەر بڕێکی زۆر ئامێری ئەلیکترۆنی تایبەت بە گزیکردن (غش) لە تاقیکردنەوەکاندا بگرن و تۆمەتبارێکیش دەستگیر بکەن.

ڕاگەیێنراوی فەرمی: بەپێی ڕاگەیێندراوەکە، بە فەرمانی دادوەری لێکۆڵینەوەی ئاسایشی هەولێر، تۆمەتبارێک بە ناوی (ب. م. ف) دەستگیرکراوە. ناوبراو لە پارێزگای بابلەوە بەشێوەیەکی قاچاخ 100 ئامێری بلوتوزی تایبەت بە گزیکردنی هێنابووە نێو شاری هەولێر.

ئاسایشی هەولێر ئاشکرای کردووە کە تۆمەتبارەکە بەنیازبووە بەر لە دەستپێکردنی تاقیکردنەوەکانی خولی دووەمی پۆلەکانی 12ی ئامادەیی، ئەم ئامێرانە بەسەر قوتابیاندا لە شاری هەولێر ساغ بکاتەوە.

ئەوەی پێویستە بیزانیت: ئەم هەنگاوەی ئاسایش لە کاتێکدایە کە ساڵانە لەگەڵ نزیکبوونەوەی وەرزی تاقیکردنەوە گشتییەکان، هەوڵەکان بۆ ڕێگریکردن لە دیاردەی گزیکردن و بەکارهێنانی ئامێری ئەلیکترۆنی لەلایەن هێزە ئەمنییەکان و وەزارەتی پەروەردەوە چڕتر دەکرێنەوە.