ئاڤا هۆکاری کەمبوونەوەی هاوکاریی دارایی هاوپەیمانان بۆ پێشمەرگە ئاشكرا دەکات

ئاڤا نیوز

 

لە ماوەی دوو ساڵی ڕابردوودا، ئەو بڕە پارەیەی وەک هاوکاریی مانگانە لەلایەن هێزەکانی هاوپەیمانانەوە دەدرێتە پێشمەرگەکانی لیوا هاوبەشەکان، بەشێوەیەکی بەرچاو کەمی کردووە. هۆکارەکەش بەهۆی زیادبوونی ژمارەی ئەو پێشمەرگانەوەیە کە لەو هاوکارییە سوودمەند دەبن.

 

ئەوەی پێویستە بیزانیت: هاوکارایی هاوپایمانان مانگانە بڕەکەی 25 ملیۆن دۆلارە، لەو بڕە مانگانە نزیکەی 15 ملیۆن دۆلاری وەک پارە دابەش دەکرێت و ئەوەی تر بۆ پێداویستی لۆجیستییە.

 

هۆکارە زانراوەکان: ئاڤا زانیویەتی هۆکاری سەرەکیی کەمبوونەوەی پشکی تاکەکەسیی پێشمەرگە، پرۆسەی یەکخستنەوە و چاکسازییە لە وەزارەتی پێشمەرگە، کە بەردەوام لیوای نوێی پێشمەرگە دەخرێنە سەر لیوا هاوبەشەکان، ئەمەش وا دەکات ژمارەی ئەو پێشمەرگانەی شایستەی وەرگرتنی هاوکارییەکەن زیاد بکات بۆ نموونە، ئەگەر چەند مانگێک لەمەوبەر ئەو بڕە پارەیە بەسەر 65 هەزار پێشمەرگەدا دابەشکرابێت، ئەم مانگە بەسەر نزیکەی 78 هەزار پێشمەرگەدا دابەشکراوە. واتە، هەمان بڕە پارە بەسەر ژمارەیەکی زیاتری پێشمەرگەدا دابەش دەکرێت.

 

لەلایەکی دیکە: سەرچاوەیەکی تایبەت لە تیمی هەژماری من بە ئاڤای گوت:لەکۆی نزیکەی 78 هەزار پێشمەرگە، مانگی حەوت 74  هەزار و 400 ئەفسەر و پێشمەرگە و پلەداری لیوا هاوبەشەکان لەڕێگەی هەژماری منەوە هاوکارییەکەیان وەرگرتووە. بەگشتیش تاوەکو ئێستا زیاتر لە 850 هەزار مووچەخۆر لە هەژماری من تۆمار کراون.