فایلی خەڵک؛ شانۆکارانی هەڵەبجە داوای هۆڵی شانۆ دەکەن

ئاڤا نیوز

هونەرمەندان و شانۆکارانی هەڵەبجە داواکارییان هەیە و دەڵێن، "تاوەکو ئێستا هۆڵی شانۆمان نیە، بۆئەوەی چالاکی هونەری و شانۆیی تێیدا ئەنجام بدەین". کاری شانۆیی لە هەڵەبجە بە تەواویی پاشەکشەی کردووە.

وێنە گەورەکە: لە هەڵەبجە تاوەکو ئێستا هۆڵی شانۆیی نییە، بۆئەوەی هونەرمەندان و شانۆکارانی ئەم شارە چالاکی هونەری و شانۆیی تێدا ئەنجام بدەن. شانۆکاران و هونەرمەندانی ئەو شارە داوا لە ئاڤا دەکەن بەدواداچوونیان بۆ بکات، بۆ چارەسەرکردنی ئەو کێشەیەیان.

زانیاریی پەیامنێر: ئاراس ڕەفیق، پەیامنێری ئاڤا میدیا لە هەڵەبجە بەدواداچوونی بۆ ئەم کێشەیە کردووە و شانۆکارانی ئەم شارە قسەیان بۆ ئاڤا کردووە و دەڵێن، بەهۆی نەبوونی هۆڵ کاری شانۆیی لە هەڵەبجە بەتەواوی پاشەکشەی کردووە.

لێدوانی فەرمی: سەرخێڵ غەفار، بەڕێوەبەری ڕۆشنبیریی هەڵەبجە بە ئاڤای وت: وەزارەتی ڕۆشنبیری و لاوانی حکومەتی هەرێمی کوردستان هۆڵێکی سەردەمییانەی لە شارەکە کردووەتەوە و ئێستا لە قۆناغی کۆتاییدایە. لەگەڵ ئەوەشدا، لەلایەن کەرتی تایبەتەوە هۆڵێکی مۆدێرن دروستکراوە، لەنزیکترین کاتدا دەخرێتە خزمەتی خەڵکی شارەکەوە.

بەڕێوەبەری ڕۆشنبیریی هەڵەبجە ڕاشیگەیاند، هۆکاری کەمبوونەوەی چالاکییە هونەرییەکان بۆ ئەو قەیرانە داراییە دەگەڕێتەوە کە ڕووی لە هەرێمی کوردستان کردووە.

بەڵێنیشی دا، لەگەڵ باشتربوونی بارودۆخی ئابووری، دەست بە چالاکی چڕوپڕتر دەکەنەوە، چ لە ناوخۆی هەڵەبجە و چ بەشداریکردن لە فیستیڤاڵەکانی دەرەوە.