سۆمۆ: ئامادەکارییەکان بۆ دەستپێکردنەوەی هەناردەی نەوتی هەرێم تەواو بوون

ئاڤا نیوز

کۆمپانیای بەبازاڕکردنی نەوتی عێراق (سۆمۆ)، ئەمڕۆ هەینی، ئاشکرایکرد، هەموو ئامادەکارییەکانی بۆ دەستپێکردنی هەناردەکردنی نەوتی هەرێمی کوردستان تەواو کردووە.

چیرۆکی سەرەکی: بەگوێرەی کۆتا ڕێککەوتنی نێوان هەولێر و بەغدا لەبەرامبەر ناردنی مووچە و شایستە داراییەکانی کوردستان بەشێوەی مانگانە، حکومەتی هەرێمی کوردستان ڕۆژانە 230 هەزار بەرمیل نەوت لە بەندەری جەیهانی تورکیا ڕادەستی کۆمپانیای سۆمۆ دەکات بەڵام بەهۆی هێرشە درۆنییەکانی ئەم دواییەی سەر کێڵگە نەوتییەکانی کوردستان ئەو بڕە کەمیکردووە، هەروەها دەبێت حکومەتی هەرێم مانگانە 120 ملیار دینار ڕادەستی وەزارەتی دارایی عێراق دەکات.

لێدوانی فەرمی:  عەلی نزار فائق، بەڕێوەبەری گشتیی کۆمپانیای سۆمۆ، ڕاگەیاند: کۆمپانیای بەبازاڕکردنی نەوتی عێراق (سۆمۆ) هەموو ئامادەکارییەکانی تەواو کردووە و سەرجەم گرێبەستەکانیشی لەگەڵ کۆمپانیا کڕیارەکاندا کۆتایی پێهێناوە.

زانیاریی زیاتر: فائق جەختی کردەوە، هەر کاتێک کۆمپانیا بەرهەمهێنەرەکانی هەرێم نەوت ڕادەست بکەن، سۆمۆ بە تەواوەتی ئامادەیە بۆ دەستپێکردنی هەناردەکردنی نەوت لە هەرێمی کوردستانەوە."

لەلایەکی دیکەوە: بەڕێوەبەری گشتیی کۆمپانیای سۆمۆ باسی لەوەشکردووە، ئێستا هەناردەی نەوتی عێراق بۆ بازارەکانی جیهان ڕۆژانە سێ ملیۆن و 400 هەزار بەرمیلە.